ពាក់ព័ន្ធនឹងសេចក្តីអត្ថាធិប្បាយរបស់រដ្ឋមន្រ្តីការពារជាតិអ៊ីស្រាអែលលោក Israel Katz បុរសជនជាតិលីបង់ម្នាក់មកពីតំបន់ជាយក្រុងភាគខាងត្បូងទីក្រុងបេរូត និយាយថា អ៊ីស្រាអែលមិនអាចរារាំងពលរដ្ឋពីការវិលត្រឡប់ទៅកាន់ភូមិដ្ឋានរបស់ពួកគេវិញបានឡើយ នៅតំបន់ភាគខាងត្បូងប្រទេសលីបង់ ។

លោក Katz និយាយកាលថ្ងៃអង្គារម្សិលមិញថា អ៊ីស្រាអែល នឹងបង្កើតតំបន់ទ្រនាប់នៅក្នុងតំបន់ភាគខាងត្បូងប្រទេសលីបង់ ហើយនិងរក្សាការគ្រប់គ្រងតំបន់នោះទាំងស្រុងរហូតដល់ទន្លេ Litani នៅពេលដែលជម្លោះជាមួយក្រុមជីវពលហេសបូឡាបញ្ចប់ ។

លោក Katz និយាយនៅក្នុងសេចក្តីថ្លែងការណ៍បន្ទាប់ពីការវាយតម្លៃថា នៅពេលបញ្ចប់ប្រតិបត្តិការសឹក កងកម្លាំងការពារជាតិអ៊ីស្រាអែល នឹងគ្រប់គ្រងតំបន់នេះរហូតដល់ទន្លេ Litani រួមទាំងស្ពានឆ្លងកាត់ទន្លេ Litani ខណៈកម្ចាត់ឲ្យអស់កងកម្លាំង Radwan ដែលបានជ្រៀតចូលតំបន់នោះ និងបំផ្លាញអាវុធទាំងអស់ដែលរកឃើញនៅទីនោះ ។ កងកម្លាំង Radwan គឺជាអង្គភាពយោធារណបក្រុមហេសបូឡា ។ 

លោកបន្តថា ពលរដ្ឋលីបង់ជាង ៦០ម៉ឺននាក់ ដែលត្រូវបានជម្លៀសចេញទៅកាន់តំបន់ភាគខាងជើងលីបង់ នឹងត្រូវហាមឃាត់ពីការវិលត្រឡប់មកកាន់តំបន់ភាគខាងត្បូងទន្លេ Litani វិញ រហូតដល់ សុវត្ថិភាពពលរដ្ឋរស់នៅតំបន់ភាគខាងជើងអ៊ីស្រាអែលត្រូវបានធានា ។ 

សូមបញ្ជាក់ថា មនុស្សជាង ១លាននាក់ បានរត់ភៀសខ្លួនចេញពីផ្ទះសម្បែងរបស់ពួកគេ និងមនុស្ស ១.២០០នាក់ ត្រូវបានសម្លាប់ នៅក្នុងការវាយប្រហាររបស់អ៊ីស្រាអែល ចាប់តាំងពីថ្ងៃទី ២ ខែមីនា រហូតមក ពេលដែលក្រុមហេសបូឡា លូកដៃចូលក្នុងជម្លោះតំបន់ជម្ឈិមបូព៌ា ជាមួយនឹងការវាយប្រហារលើអ៊ីស្រាអែល ៕