ភ្នំពេញ៖ រមណីយដ្ឋានវត្តភ្នំ សួនណាហ្គាវើល និងតំបន់វិមានឈ្នះឈ្នះ និងគោលដៅផ្សេងទៀតនៅរាជធានីភ្នំពេញ ត្រូវបានអាជ្ញាធរមូលដ្ឋាន និងបណ្តាម្ចាស់អាជីវកម្មនានាចាប់ផ្តើមរៀបចំតុបតែងលំអរ ដើម្បីត្រៀមទទួលប្រជាពលរដ្ឋ និងភ្ញៀវទេសចរជាតិ និងអន្តរជាតិ ចូលរួមលេងកម្សាន្តសប្បាយ នៅថ្ងៃបុណ្យចូលឆ្នាំថ្មីប្រពៃណីជាតិ ដែលនឹងឈានចូលមកដល់ថ្ងៃទី១៤ ខែមេសានេះ។

លោក ជុំ វុឌ្ឍី ប្រធានមន្ទីរវប្បធម៌ និងវិចិត្រសិល្បៈ បានថ្លែងប្រាប់BTVនៅថ្ងៃទី១ ខែមេសានេះថា មន្ទីរ បានចាប់ផ្តើមកាត់ដែកផ្គុំផ្សារដំឡើងគ្រោងឆ្អឹង ដើម្បីបើកការដ្ឋានដំឡើងតង់ ធ្វើឆាក រៀបចំកម្មវិធីបើក​សង្ក្រាន្ត​ឆ្នាំថ្មី ​ដែលមានការនាំគ្នាលេងល្បែង​ប្រពៃណីជាតិ ​ វាយក្អម ចោលឈូង​ទាញព្រ័ត្រ ​ការតាំង​ពិព័រណ៍ ​និងការ​ប្រគំ​តន្ត្រី ​នាំគ្នារាំកម្សាន្តរយៈពេល៣ថ្ងៃ​ក្នុងបរិវេណ​រមណីយដ្ឋាន​វត្តភ្នំ។

លោក ជុំ វុឌ្ឍី បន្តថា សម្រាប់ការរៀបចំកម្មវិធី​សង្ក្រាន្ត​ឆ្នាំនេះ ​នៅ​គោលដៅ​ទីតាំងវត្តភ្នំ គឺ​មន្ទីរបាន​ហាមប្រាម​លេងល្បែងបាចទឹកដាក់គ្នា ​ហើយគ្រប់ពលរដ្ឋ ​និងភ្ញៀវទេសចរជាតិ​អន្តរជាតិ ដែល​ចូលកម្សាន្ត ​គឺតម្រូវឱ្យពាក់ម៉ាស ​ហើយអាជ្ញាធរការពារអាច​ នឹងពិនិត្យប័ណ្ណចាក់វ៉ាក់សាំងកូវីដ១៩ មុននឹង​អនុញ្ញាត​អោយចូល។

សាលារាជធានីភ្នំពេញ បានប្រកាសអោយបណ្តាអាជីវកម្ម ​រមណីយដ្ឋាន​ទេសចរណ៍ និង​វត្តអារ៉ាមនានា ​រៀបចំ​កម្មវិធីសង្គ្រាន្ត​បុណ្យ​ចូលឆ្នាំថ្មីប្រពៃណីជាតិដូចធម្មតាឡើងវិញ និង​អនុញ្ញាត​មានការរៀបចំលេងល្បែងកម្សាន្ត​ វាយក្អម ​ទាញព្រ័ត្រ​និងរាំកម្សាន្ត ប៉ុន្តែគ្រប់អ្នក​ចូលរួម​គឺ​ត្រូវពាក់ម៉ាស់​ទំាងអស់គ្នា​ ហើយអាជ្ញាធរមូលដ្ឋាន​សហការគ្នាឈរចាំជួយ​ណែនាំ និង​រៀបចំទាំង​ការរក្សាគន្លាត​ ក៏ដូចការការសន្តិសុខ​ សណ្តាប់ធ្នាប់ ​ជូនពលរដ្ឋអោយបានល្អប្រសើរ៕ អត្ថបទ ស៊ុម សុខជា