យោធាអ៊ីស្រាអែលកាលពីថ្ងៃពុធ ទី១ ខែមេសា បាននិយាយថា ខ្លួនបានសម្លាប់មេបញ្ជាការជាន់ខ្ពស់របស់ក្រុមហេសបូឡា លោក Haj Youssef Ismail Hashem ជាការវាយប្រហារខ្លាំងបំផុតចំពោះក្រុមនេះចាប់តាំងពីការប្រយុទ្ធគ្នាថ្មីជាមួយអ៊ីស្រាអែល បានផ្ទុះឡើងកាលពីដើមខែមុន។

អ្នកនាំពាក្យយោធារបស់ប្រទេស លោក Avichay Adraee បាននិយាយនៅក្នុងសេចក្តីថ្លែងការណ៍នៅលើបណ្តាញ X ថា កងទ័ពជើងទឹកអ៊ីស្រាអែលបានសម្លាប់លោក Hashem មេបញ្ជាការសមរភូមិភាគខាងត្បូងរបស់ក្រុមហេសបូឡា។ ក្រោយមក ក្រុមហេសបូឡា បានបញ្ជាក់ពីការស្លាប់របស់លោកនៅក្នុងសេចក្តីថ្លែងការណ៍មួយកាលពីថ្ងៃពុធ ដោយចាត់ទុកលោកជា «ពន្លឺភ្លើងនាំផ្លូវនៃក្រុមតស៊ូអ៊ីស្លាម»។

ការស្លាប់របស់លោក ត្រូវបានចាត់ទុកថាជាឧបសគ្គធំបំផុតមួយដែលក្រុមនេះបានទទួលរងចាប់តាំងពីការសម្លាប់នាយសេនាធិការ លោក Haytham Ali Tabtabai ក្នុងខែវិច្ឆិកា ឆ្នាំ២០២៥។ ក្រុមហេសបូឡា ដែលគាំទ្រដោយអ៊ីរ៉ង់ បានបាត់បង់មេបញ្ជាការជាន់ខ្ពស់ភាគច្រើនរូបរបស់ខ្លួន បន្ទាប់ពីសង្គ្រាមចុងក្រោយជាមួយអ៊ីស្រាអែល ដែលបានផ្ទុះឡើងចាប់ពីខែតុលា ឆ្នាំ២០២៣ ដល់ខែវិច្ឆិកា ឆ្នាំ២០២៤។

ការផ្អាកអំពើហិង្សា បានបង្ហាញថាមានរយៈពេលខ្លី ខណៈពេញមួយបទឈប់បាញ់ អ៊ីស្រាអែលបានកំណត់គោលដៅលើមេបញ្ជាការ និងប្រតិបត្តិករក្រុមហេសបូឡានៅទូទាំងប្រទេសលីបង់។

ការប្រយុទ្ធគ្នា បានផ្ទុះឡើងជាថ្មីនៅដើមខែមុន បន្ទាប់ពីក្រុមហេសបូឡា បានបាញ់រ៉ូកែតទៅលើអ៊ីស្រាអែល ជំរុញឱ្យមានការសងសឹកដែលបានពង្រីកទៅជាសង្គ្រាមទ្រង់ទ្រាយធំ។ ចាប់តាំងពីពេលនោះមក មនុស្សជាង ១,២ លាននាក់ ត្រូវបានជម្លៀសខ្លួនចេញពីលំនៅឋានរបស់ពួកគេនៅក្នុងប្រទេសលីបង់ ហើយការវាយប្រហាររបស់អ៊ីស្រាអែល បានសម្លាប់មនុស្សជាង ១.២៦០ នាក់ នេះបើយោងតាមអាជ្ញាធរលីបង់។