អវកាសយានិក ៤រូប របស់អង្គការណាសា បានជិះយានអវកាសចេញពីឆ្នេររដ្ឋ Florida របស់សហរដ្ឋអាមេរិក កាលពីថ្ងៃពុធ (១ មេសា) ក្នុងបេសកកម្ម Artemis II របស់ណាសា ដែលជាដំណើរដ៏មានសារៈសំខាន់រយៈពេល ១០ថ្ងៃ ជុំវិញឋានព្រះចន្ទ។ នេះគឺជាជំហានដ៏ក្លាហានបំផុតរបស់សហរដ្ឋអាមេរិក ក្នុងការបញ្ជូនមនុស្សឱ្យត្រឡប់ទៅកាន់ផ្ទៃព្រះចន្ទវិញក្នុងទសវត្សរ៍នេះ ដើម្បីសម្រេចបេសកកម្មនាំមនុស្សទៅឋានព្រះចន្ទឱ្យបានមុនប្រទេសចិន។

រ៉ូកែត SLS របស់ណាសា ដែលមានកន្សោមយាន Orion នៅផ្នែកខាងលើ បានបញ្ឆេះម៉ាស៊ីនចាកចេញនៅម៉ោងក្នុងស្រុក ៦:៣៥ នាទីល្ងាច (ម៉ោងនៅអាមេរិកភាគខាងកើត) នៅមជ្ឈមណ្ឌលអវកាស Kennedy ដើម្បីនាំយកអវកាសយានិកអាមេរិក ៣រូប និងអវកាសយានិកកាណាដា ១រូប ចាកចេញពីភពផែនដី។

ក្រុមការងារ Artemis II ដែលរួមមានអវកាសយានិកណាសា គឺលោក Reid Wiseman លោក Victor Glover និងលោកស្រី Christina Koch ព្រមទាំងអវកាសយានិករបស់ទីភ្នាក់ងារអវកាសកាណាដា លោក Jeremy Hansen បានចាប់ផ្ដើមបេសកកម្មជិត ១០ថ្ងៃ ជុំវិញឋានព្រះចន្ទរួចត្រឡប់មកផែនដីវិញ ដែលនឹងនាំពួកគេទៅក្នុងលំហអាកាសកាន់តែជ្រៅ ជាងអ្វីដែលមនុស្សជាតិធ្លាប់បានទៅដល់ពីមុនមក។

បន្ទាប់ពីឆ្លងកាត់ការហ្វឹកហ្វឺនអស់ជិត ៣ឆ្នាំ ក្រុមអវកាសយានិកនេះគឺជាក្រុមដំបូងគេដែលហោះហើរក្នុងកម្មវិធី Artemis របស់ណាសា ដែលជាបេសកកម្មចំណាយប្រាក់រាប់ពាន់លានដុល្លារ បង្កើតឡើងក្នុងឆ្នាំ២០១៧ ដើម្បីកសាងវត្តមានរយៈពេលវែងរបស់សហរដ្ឋអាមេរិក នៅលើឋានព្រះចន្ទ ក្នុងទសវត្សរ៍ក្រោយ និងបន្តបន្ទាប់ទៀត។ បេសកកម្ម Artemis II គឺជាជំហានដំបូងដ៏សំខាន់នៅក្នុងកម្មវិធីរបស់អាមេរិក ក្នុងការនាំមនុស្សទៅឋានព្រះចន្ទដ៏ធំល្វឹងល្វើយ ដែលមានគោលដៅឱ្យមនុស្សចុះចតនៅលើផ្ទៃព្រះចន្ទ ជាលើកដំបូងក្នុងឆ្នាំ២០២៨ ក្នុងបេសកកម្មឈ្មោះថា Artemis IV៕