ភ្នំពេញ៖ សហគមន៍ខ្មែរអ៊ិស្លាម ក៏ដូចជាសមាគម និងអង្គការអ៊ិស្លាមមិនមែនរដ្ឋាភិបាល បានបង្ហាញនូវការប្ដេជ្ញាចិត្ត បន្តចូលរួមអភិវឌ្ឍន៍សង្គមជាតិកម្ពុជា ឲ្យកាន់តែរីកចម្រើនបន្ថែមទៀត ដើម្បីឆ្លើយតបទៅនឹងគុណបំណាច របស់រាជរដ្ឋាភិបាលកម្ពុជា ដែលបានផ្ដល់សិទ្ធិសេរីភាព ចំពោះសាសនិកឥស្លាមនៅកម្ពុជា បានគោរពប្រតិបត្តិប្រពៃណី ដោយគ្មានការរើសអើង ។

 ការប្ដេជ្ញានេះ ធ្វើឡើងក្នុងកិច្ចប្រជុំស្តីពី “បច្ចុប្បន្នភាព និងទិសដៅអភិវឌ្ឍន៍រួមគ្នា របស់សមាគម អង្គការអ៊ិស្លាមមិនមែនរដ្ឋាភិបាល” កាលពីរសៀលថ្ងៃទី១ ខែមេសា ឆ្នាំ២០២៦ មានការអញ្ជើញចូលរួមពីឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស រួមទាំងប្រធាន អនុប្រធានសមាគម អង្គការអ៊ិស្លាម ចំនួន៨៣ និងសាលារៀនក្រោមចំណុះសមាគម អង្គការចំនួន៥២ មកពីរាជធានី-ខេត្ត ទូទាំងប្រទេស សរុប ២៥០នាក់។

កិច្ចប្រជុំនេះ ធ្វើឡើងក្នុងគោលបំណង រឹតចំណងសាមគ្គីភាពគ្នាបន្ថែមទៀត ក្នុងគោលដៅតែមួយ គឺការអភិវឌ្ឍន៍សហគមន៍ បង្កើតជាបណ្តាញមួយក្នុងការទទួល និងផ្តល់ព័ត៌មានគ្នាទៅវិញទៅមក ដើម្បីងាយស្រួលក្នុងការ រៀបចំវគ្គបណ្តុះបណ្តាល និងសិក្ខាសាលាផ្សេងៗនាពេលខាងមុខ និងផ្តល់ការគាំទ្រគ្នាទៅវិញទៅមក។

ក្នុងឱកាសនោះ ឯកឧត្តមទេសរដ្ឋមន្ត្រី អូស្មាន ហាស្សាន់ បានសម្តែងការកោតសរសើរ និងវាយតម្លៃខ្ពស់បំផុត ចំពោះស្មារតីមនុស្សធម៌ដ៏មោះមុតរបស់សហគមន៍ខ្មែរឥស្លាម រួមទាំងអង្គការសមាគមទាំងអស់ ដែលបានខិតខំកៀរគរជំនួយ ពីបណ្តាប្រទេសឥស្លាម និងមិត្តភក្តិលើពិភពលោក ដើម្បីមកកសាងសមិទ្ធផលជាច្រើន រួមមាន៖ សាលារៀន វិហារឥស្លាម សូរ៉ាវ គម្រោងវ៉ាកហ្វ (គរុភណ្ឌ) អណ្តូងទឹកស្អាត បង្គន់អនាម័យ ការបរិច្ចាគទ្រព្យហ្សាកាត់ កញ្ចប់អាហារស្រាយបួស និងការផ្តល់អាហារូបករណ៍ ជូនដល់សិស្សនិស្សិតមានជីវភាពខ្វះខាត នៅតាមសហគមន៍។ល។

ឯកឧត្តមបានបន្តថា សកម្មភាពទាំងនេះ បង្ហាញថាសហគមន៍ខ្មែរឥស្លាមនៅកម្ពុជា ជាដៃគូអភិវឌ្ឍន៍របស់រាជរដ្ឋាភិបាល ក្នុងការចូលរួមចំណែកអភិវឌ្ឍន៍សហគមន៍ ក៏ដូចជាសង្គមជាតិទាំងមូល ដោយរាជរដ្ឋាភិបាលកម្ពុជា តែងតែស្វាគមន៍ និងគាំទ្រយ៉ាងពេញទំហឹង ចំពោះជំនួយ និងអំណោយ ដែលផ្តល់ដោយអង្គការសប្បុរសធម៌ផ្សេងៗ ដើម្បីផ្តល់ផលប្រយោជន៍រួមដល់ប្រជាជនកម្ពុជា ។

 ក្នុងពេលចូលរួមកិច្ចប្រជុំ ប្រធានអង្គការសមាគម បានបង្ហាញពីការប្ដេជ្ញា បន្តចូលរួមជាមួយរាជរដ្ឋាភិបាលកម្ពុជា ក្នុងការអភិវឌ្ឍប្រទេសជាតិ និងការជួយលើកកម្ពស់ជីវភាពប្រជាពលរដ្ឋនោតាមមូលដ្ឋាន មានជួយសាងសងសាលារៀន កសាងផ្ទះជូនពលរដ្ឋក្រីក្រ ការផ្ដល់អាហារូបករណ៍ដល់សិស្សនិស្សិត និងការបណ្ដុះបណ្ដាលជំនាញវិជ្ជាជីវដល់យុវជនជាដើម ។

យោងតាមទិន្នន័យពីក្រសួងមហាផ្ទៃ ប្រទេសកម្ពុជាមានសមាគម និងអង្គការចុះបញ្ជីសរុបចំនួន៦ ៥៧១ ដែលក្នុងនោះមានសមាគម និងអង្គការឥស្លាមជាង៣០០ ដែលកំពុងធ្វើសកម្មភាពយ៉ាងសកម្ម លើវិស័យសំខាន់ៗ ដូចជា អប់រំ សុខាភិបាល មនុស្សធម៌ សង្គមកិច្ច និងលើវិស័យផ្សេងៗទៀតជាច្រើន ៕ អត្ថបទ បាន សុខរិទ្ធិ