ភាគហ៊ុនបានធ្លាក់ចុះ ប្រាក់ដុល្លារ និងប្រេងឡើងថ្លៃនៅថ្ងៃព្រហស្បតិ៍ទី២មេសាសប្ដាហ៍នេះ បន្ទាប់ពីប្រធានាធិបតីសហរដ្ឋអាមេរិក លោក Donald Trump បាននិយាយថា គោលបំណងយុទ្ធសាស្ត្រស្នូល របស់ទីក្រុងវ៉ាស៊ីនតោននៅក្នុងសង្គ្រាមអ៊ីរ៉ង់ជិតដល់ទីបញ្ចប់ហើយ ប៉ុន្តែពុំបានផ្តល់ផែនការច្បាស់លាស់ថាពេលណាជម្លោះនេះនឹងបញ្ចប់នោះទេ។

ការរំពឹងទុកនៃការបញ្ចប់សង្គ្រាមអាមេរិក-អ៊ីស្រាអែលរយៈពេលជាងមួយខែជាមួយអ៊ីរ៉ង់បានធ្វើឱ្យភាគហ៊ុនសកលកញ្ជ្រោលឡើង និងបានធ្វើឱ្យតម្លៃប្រាក់ដុល្លារធ្លាក់ចុះពីកម្រិតខ្ពស់បំផុតរបស់ខ្លួនក្នុងរយៈពេលពីរវគ្គកន្លងមក បន្ទាប់ពីខែមីនាដ៏អាប់អួ ជាទីដែលតម្លៃប្រេងកើនឡើង បានធ្វើឱ្យតម្លៃទ្រព្យសកម្មមានហានិភ័យធ្លាក់ចុះ។

ប៉ុន្តែលោក Trump នៅក្នុងសុន្ទរកថាដ៏សំខាន់របស់លោកបាននិយាយថា សហរដ្ឋអាមេរិកនឹងវាយកម្ទេចអ៊ីរ៉ង់ឲ្យរលាយ ក្នុងរយៈពេលពីរទៅបីសប្តាហ៍ខាងមុខ និងវាយប្រហារប្រទេសនេះឲ្យធ្លាក់ចូលទៅក្នុងយុគថ្មបំបែក។សម្ដីទាំងនោះបានធ្វើឱ្យភាគហ៊ុនសកលធ្លាក់ចុះ ដោយតម្លៃភាគហ៊ុនអាមេរិកធ្លាក់ចុះ០,៦៧% ខណៈតម្លៃភាគហ៊ុននៅតំបន់អឺរ៉ុបធ្លាក់ចុះ ០,១0%។

សន្ទស្សន៍ភាគហ៊ុនទូលំទូលាយបំផុតរបស់ MSCI នៃភាគហ៊ុនអាស៊ីប៉ាស៊ីហ្វិក នៅក្រៅប្រទេសជប៉ុនបានធ្លាក់ចុះ ០,៧៥%។ សន្ទស្សន៍ភាគ ហ៊ុន Nikkei របស់ជប៉ុនបានធ្លាក់ចុះ ០,៧៩% ក្នុងការជួញដូរក្រោមភាពប្រែប្រួល។

តម្លៃប្រេងឆៅ Brent បានកើនឡើងជាង ៤%ដល់១០៥,៥៥ ដុល្លារអាមេរិកក្នុងមួយបារ៉ែក ខណៈប្រេងឆៅ West Texas Intermediateរបស់អាមេរិកដែរនោះ បានកើនឡើង៣%ដល់១០៣,១៦ ដុល្លារអាមេរិកក្នុងមួយបារ៉ែល។ប្រាក់ដុល្លារអាមេរិកគឺជាជម្រើសដ៏ល្អប្រសើរក្នុងចំណោមវិនិយោគិន អំឡុងពេលមានភាពចលាចល ហើយប្រាក់ដុល្លារបានកើនឡើងធៀបនឹងរូបិយប័ណ្ណភាគច្រើនបន្ទាប់ពីសុន្ទរកថាលោកTrump ៕