អាជ្ញាធរ និងសាក្សីនៅកន្លែងកើតហេតុបាននិយាយថា គ្រោះរញ្ជួយដីដ៏ខ្លាំងក្លាកម្រិត ៧,៦រ៉ិចទ័រ បានវាយប្រហារនៅសមុទ្រម៉ូលូកាភាគខាងជើង នៃប្រទេសឥណ្ឌូនេស៊ី ក្នុងថ្ងៃព្រហស្បតិ៍ ទី២ ខែមេសា នេះ ដោយបានសម្លាប់មនុស្សយ៉ាងតិចម្នាក់ បំផ្លាញអគារមួយចំនួន និងបង្កឱ្យមានរលកយក្សស៊ូណាមិ ហើយភ្នាក់ងារត្រួតពិនិត្យនិយាយថា លទ្ធភាពនៃការស្លាប់ និងរបួសបន្ថែមទៀតគឺទាបខ្លាំងណាស់។

ទីភ្នាក់ងារឧតុនិយមឥណ្ឌូនេស៊ី BMKG បាននិយាយថា មានរលកយក្សស៊ូណាមិត្រូវបានរាយការណ៍នៅក្នុងទីតាំងចំនួនប្រាំ ដែលខ្ពស់បំផុតគឺ ០,៧៥ម៉ែត្រ នៅតំបន់ North Minahasa ក្នុងខេត្ត North Sulawesi ហើយមានរញ្ជួយដីជាបន្តបន្ទាប់ធំៗបន្ថែមចំនួន ៥០ដង ក្នុងកម្រិត ៥,៨ រ៉ិចទ័រ។ ក្រសួងឥណ្ឌូនេស៊ី បានព្រមានសាធារណជនឱ្យបន្តប្រុងប្រយ័ត្ន។

អាជ្ញាធរព្រមានពីរលកយក្សស៊ូណាមិរបស់សហរដ្ឋអាមេរិក ដំបូងឡើយបាននិយាយថា រលកយក្សស៊ូណាមិដ៏គ្រោះថ្នាក់អាចកើតមានឡើងនៅតាមបណ្តោយឆ្នេរសមុទ្រនៃប្រទេសឥណ្ឌូនេស៊ី ហ្វីលីពីន និងម៉ាឡេស៊ី នៅក្នុងចម្ងាយ ១ពាន់គីឡូម៉ែត្រ ពីចំណុចកណ្តាលនៃរញ្ជួយដី ប៉ុន្តែក្រោយមកបានដកការព្រមាននេះវិញ។

អនុប្រធាននគរបាលខេត្ត Sulawesi ខាងជើង លោក Awi Setiyono បានប្រាប់អ្នកយកព័ត៌មានថា មនុស្សម្នាក់បានស្លាប់ក្នុងគំនរបាក់បែកនៅតំបន់ Manado នៅពេលផ្នែកមួយនៃអគារដែលប្រើប្រាស់ដោយអាជ្ញាធរកីឡាក្នុងតំបន់ បានបាក់សង្កត់។ ចំណុចកណ្តាលនៃរញ្ជួយ មានចម្ងាយប្រហែល ៥៨០គីឡូម៉ែត្រ ភាគខាងត្បូងនៃឆ្នេរសមុទ្រហ្វីលីពីន និង ១ពាន់គីឡូម៉ែត្រ ពីរដ្ឋ Sabah ប្រទេសម៉ាឡេស៊ី ហើយបានវាយប្រហារនៅជម្រៅ ៣៥ គីឡូម៉ែត្រ៕