ចក្រភពអង់គ្លេស បានប្រកាសពីផែនការរៀបចំកិច្ចប្រជុំពហុជាតិសាសន៍មួយ ដើម្បីពិភាក្សាអំពីវិធីដើម្បីបើកឡើងវិញច្រកសមុទ្រ Hormuz។

នាយករដ្ឋមន្ត្រី លោក Keir Starmer បានប្រាប់អ្នកសារព័ត៌មានកាលពីថ្ងៃពុធថា រដ្ឋមន្ត្រីការបរទេស លោក Yvette Cooper នឹងរៀបចំកិច្ចពិភាក្សានេះ ដែលនឹងនាំមកនូវប្រទេសចំនួន៣៥ ប្រទេសដែលបានបង្ហាញពីការត្រៀមចូលរួម។

លោកបាននិយាយថា អ្នកចូលរួមនឹងវាយតម្លៃពី «វិធានការផ្នែកការទូត និងផ្នែកនយោបាយដែលអាចអនុវត្តបានទាំងអស់» ដោយប្រទេសទាំងនេះអាចស្តារឡើងវិញសេរីភាពនៃការធ្វើនាវាចរណ៍ ការធានាបានសុវត្ថិភាពរបស់នាវានិងនាវិកដែលជាប់គាំង និងការបន្តសកម្មភាពទំនិញសំខាន់ៗ។

ប្រភពព័ត៌មានពីរដ្ឋាភិបាលអង់គ្លេសនិយាយថា កិច្ចប្រជុំនេះ នឹងត្រូវបានធ្វើឡើងតាមអនឡាញនៅថ្ងៃព្រហស្បតិ៍ ហើយបន្ទាប់ពីការចរចា មន្ត្រីការពារជាតិនៃប្រទេសដែលចូលរួម នឹងបើកកិច្ចចរចាកម្រិតការងារ។