ភ្នំពេញ៖ ផ្សារពាណិជ្ជកម្មតាមប្រព័ន្ធអេឡិចត្រូនិកខេមបូឌាត្រេដ (Cambodia Trade) របស់ក្រសួងពាណិជ្ជកម្ម ត្រូវបានដាក់ឱ្យដំណើរការជាផ្លូវការ។ វត្តមាននៃផ្សារអនឡាញនេះ សគ្រាសធុនតូច និងមធ្យមនៅកម្ពុជា បានចាត់ទុកថា ផ្សារពាណិជ្ជកម្មតាមប្រព័ន្ធអេឡិចត្រូនិក​ខេមបូឌាត្រេដ (Cambodia Trade) របស់ក្រសួងពាណិជ្ជកម្ម នឹងរួមចំណែកថែមមួយកម្រិតទៀតដល់ការដាក់តាំងលក់ផលិតផលខ្មែរទៅលើទីផ្សារ ជាពិសេសទីផ្សារអន្តរជាតិ។

ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម នៅក្នុងពិធីសម្ពោធដាក់ឱ្យដំណើរការផ្សារ​ខេមបូឌាត្រេដ ​កាលពីរសៀលថ្ងៃទី៣១ មីនា ឆ្នាំ២០២២កន្លងទៅ ​នៅរាជធានីភ្នំពេញ បាន​មាន​ប្រសាសន៍ថា ផ្សារខេមបូឌាត្រេដ ចូលរួម​ជួយជំរុញ និងគាំទ្រ​សហគ្រាសធុន​មីក្រូ តូច និង​មធ្យម​កម្ពុជា ដើម្បីបង្កើនការលក់ និងនាំចេញផលិតផលខ្មែរទៅកាន់ទីផ្សារអន្តរជាតិ តាមរយៈ​ពាណិជ្ជកម្ម​តាមប្រព័ន្ធអេឡិចត្រូនិក។

ឯកឧត្តម បានបន្តថា ផ្សារខេមបូឌាត្រេដ ត្រូវបានបង្កើតឡើងក្នុងពេលដ៏​សមស្រប​ដែលកម្ពុជា បាន​កសាង​មូលដ្ឋានប្រព័ន្ធអេកូឡូហ្ស៊ី សម្រាប់គាំទ្រដល់វិស័យពាណិជ្ជកម្មតាមប្រព័ន្ធអេឡិចត្រូនិក ព្រមទាំង​ការផ្តល់ឱកាស​ដល់សហគ្រាសធុនតូច​ និង​មធ្យមចូលរួម​គាំទ្រ​ដល់វិស័យនេះ ដើម្បី​ធានា​ឱ្យបានថា ផ្សារនេះអនុលោមតាមច្បាប់ជាតិ ​និង​បញ្ញត្តិ​ពាក់ព័ន្ធក្នុងស្រុក និងមានលក្ខណៈស្របតាម​ស្តង់ដារ​អន្តរជាតិ ​ក្នុងគោលដៅការពារផលប្រយោជន៍​សហគ្រាសធុនតូច ​និងមធ្យម និងអ្នក​ប្រើប្រាស់ ព្រមទាំងការទាក់ទាញបន្ថែមទៀតនូវវិនិយោគិនក្នុងស្រុក ​និងអន្តរជាតិបន្ថែមទៀត។

​លោកស្រី ចេន សុភាព ស្ថាបនិកកីតម្បាញខ្មែរ និងកញ្ញា សឹង សុផា​ អ្នកគ្រប់គ្រង​ទូទៅ​នៃសិលា ផិបភើរ ខូអិលធីឌី ​បានបង្ហាញក្តីសប្បាយ​រីករាយ ​និងថ្លែង​អំណរ​គុណដល់ថ្នាក់​ដឹកនាំគ្រប់ជាន់ថ្នាក់​នៃ​ក្រសួងពាណិជ្ជកម្ម ដែលបានបង្កើតឲ្យមានផ្សារនេះឡើង ​ដើម្បីធ្វើឲ្យផលិតផលរបស់ពួកគាត់ កាន់​តែទូលំទូលាយថែមទៀត​ក្នុងការតាំងបង្ហាញលក់​ ជូនដល់អ្នកប្រើប្រាស់ទាំងនៅក្នុងស្រុក និងក្រៅស្រុក។

ពួកគាត់រំពឹងទៀតថា បន្ទាប់ពីផ្សារនេះដាក់ឲ្យដំណើរការផ្លូវការហើយ នឹងធ្វើឲ្យការលក់កាន់​តែ​កើនឡើង​ថែមទៀត​ ជាពិសេសបង្កើតឱកាសការងារដល់ប្រពលរដ្ឋ​ដែល​កំពុងខ្វះខាត។

គិតរហូតមកដល់ពេលនេះ ​ផ្សារខេមបូឌាត្រេដ ​ទទួលបានសហគ្រាសធុនតូច ​និងមធ្យមនៅកម្ពុជា ចុះឈ្មោះចំនួន ​៣៩៤ ក្រុមហ៊ុន/សហគ្រាស ​ក្នុងនោះមាន​ ១០៧ក្រុមហ៊ុន/សហគ្រាស ត្រូវបាន​អនុញ្ញាត​ឲ្យដំណើរការគណនីរបស់ខ្លួន។ ចំណែកចំនួនផលិតផលដាក់លើកនៅ​លើ​ផ្សារខេមបូឌាត្រេដ ​មាន​រហូតដល់ជាង ១.០០០មុខ។

តាមផែនការត្រឹម​ពាក់​កណ្តាលឆ្នាំ ​២០២៣ ផ្សារខេមបូឌាត្រេដ ​នឹងមាន​សហគ្រាសធុនតូច និង​មធ្យម​កម្ពុជា​ យ៉ាងហោចណាស់ ៥០០ក្រុមហ៊ុន/សហគ្រាស ​ចុះឈ្មោះលើផ្សារខេមបូឌាត្រេដ ៕ អត្ថបទ៖ បូរ៉ាវី