មន្ត្រីជាន់ខ្ពស់នៃអាជ្ញាធរការពារជាតិកោះតៃវ៉ាន់ បាននិយាយនៅថ្ងៃព្រហស្បតិ៍ (២ មេសា) នេះថា ការពន្យារពេលក្នុងការអនុម័តថវិការបស់កោះតៃវ៉ាន់ នៅឆ្នាំនេះ បានគំរាមកំហែងដល់ការចំណាយចំនួន ៧៨ ពាន់លានដុល្លារតៃវ៉ាន់ (ឬប្រមាណ ២,៤៤ ពាន់លានដុល្លារអាមេរិក) ក្នុងការផ្គត់ផ្គង់ផ្នែកសព្វាវុធ ការថែទាំ និងការបណ្តុះបណ្តាល។

រដ្ឋបាលរបស់មេដឹកនាំកោះតៃវ៉ាន់ លោក Lai Ching-te បាននិយាយកាលពីខែសីហាឆ្នាំមុនថា ការចំណាយលើវិស័យការពារជាតិត្រូវបានកំណត់ឱ្យកើនឡើង ២២,៩% ដល់ចំនួន ៩៤៩,៥ ពាន់លានដុល្លារតៃវ៉ាន់ នៅឆ្នាំ២០២៦។ តួលេខរដ្ឋាភិបាលកោះ បានបង្ហាញថា ដោយមានអត្រា ៣,៣២% នៃផលិតផលក្នុងស្រុកសរុប (GDP) តួលេខថវិកានេះនឹងលើសពីកម្រិត ៣% ជាលើកដំបូងចាប់តាំងពីឆ្នាំ២០០៩។

រដ្ឋាភិបាលតៃវ៉ាន់បាននិយាយថា ខ្លួនត្រូវចំណាយបន្ថែមទៀតដើម្បីទប់ទល់នឹងសម្ពាធរបស់ប្រទេសចិន ដែលអះអាងសិទ្ធិអធិបតេយ្យភាពលើកោះនេះ ខណៈទីក្រុងប៉េកាំង បានបង្កើនសម្ពាធយោធាដូចជាការធ្វើសមយុទ្ធសង្គ្រាមធំៗជាដើម។ ប៉ុន្តែសភាតៃវ៉ាន់ ដែលគ្របដណ្ដប់ដោយបក្សប្រឆាំង បានពន្យារពេលការអនុម័តថវិកា ក៏ដូចជាសំណើពិសេសដាច់ដោយឡែកមួយសម្រាប់ការចំណាយយោធាបន្ថែមចំនួន ៤០ពាន់លានដុល្លារ ដោយនិយាយថា ខ្លួនគាំទ្រការចំណាយលើការការពារជាតិបន្ថែមទៀត ប៉ុន្តែនឹងមិនចុះហត្ថលេខាលើ «មូលប្បទានប័ត្រគ្មានសាច់ប្រាក់» នោះឡើយ។

លោក Yen Ming-teh ប្រធាននាយកដ្ឋានថវិការបស់អាជ្ញាធរការពារជាតិតៃវ៉ាន់ បាននិយាយថា ការពន្យារពេលនេះមានន័យថា អាជ្ញាធរនឹងមិនអាចអនុវត្តថវិកា ២១% នៃកញ្ចប់ថវិកាឆ្នាំនេះ ក្រោមកាលវិភាគដើមបានទេ ដែលប៉ះពាល់ដល់ការចំណាយចំនួន ៧៨ពាន់លានដុល្លារតៃវ៉ាន់៕