ប្រមុខដឹកនាំនៃទីភ្នាក់ងារថាមពលអន្តរជាតិ (IEA) មូលនិធិរូបិយវត្ថុអន្តរជាតិ (IMF) និងធនាគារពិភពលោក (World Bank) កាលពីថ្ងៃពុធ (១ មេសា) បានប្រកាសថា ពួកគេនឹងបង្កើតក្រុមសម្របសម្រួលមួយ ដើម្បីបង្កើនប្រសិទ្ធភាពនៃការឆ្លើយតបទៅនឹងផលប៉ះពាល់ដ៏ធ្ងន់ធ្ងរផ្នែកសេដ្ឋកិច្ច និងថាមពលសកល ដែលបណ្តាលមកពីសង្គ្រាមនៅមជ្ឈិមបូព៌ា។

ក្នុងសេចក្តីថ្លែងការណ៍រួម ស្ថាប័នសកលទាំងបីបានកត់សម្គាល់ថា សង្គ្រាមបានបង្កឱ្យមានការរំខានយ៉ាងខ្លាំងក្លានៅក្នុងតំបន់ និងបានរុញឱ្យមានកង្វះខាតការផ្គត់ផ្គង់ដ៏ធំបំផុតមួយក្នុងប្រវត្តិសាស្ត្រទីផ្សារថាមពលសកល។ ប្រមុខដឹកនាំនៃ IMF និង IEA ក៏ដូចជាធនាគារពិភពលោក បានលើកឡើងថា៖ «អំឡុងពេលដែលមានភាពមិនច្បាស់លាស់កម្រិតខ្ពស់បែបនេះ រឿងសំខាន់បំផុតគឺស្ថាប័នសកលទាំងបីត្រូវរួមកម្លាំងគ្នា ដើម្បីតាមដានរាល់ការវិវត្ត តម្រឹមការវិភាគឱ្យស្របគ្នា និងសម្របសម្រួលការគាំទ្រដល់អ្នកបង្កើតគោលនយោបាយ ដើម្បីដោះស្រាយវិបត្តិ»។

ស្ថាប័នអន្តរជាតិទាំងនេះបានបញ្ជាក់ថា ក្រុមសម្របសម្រួលថ្មីនឹងធ្វើការវាយតម្លៃលើកម្រិតនៃផលប៉ះពាល់នៅតាមបណ្តាប្រទេសនីមួយៗ សម្របសម្រួលយន្តការឆ្លើយតប និងកៀងគរភាគីពាក់ព័ន្ធ ដើម្បីផ្តល់ការគាំទ្រដល់បណ្ដាប្រទេសដែលកំពុងត្រូវការជំនួយ។

ទីភ្នាក់ងារសកលទាំងបីបានបន្ថែមថា យន្តការឆ្លើយតបអាចរួមមាន៖ ការផ្តល់ប្រឹក្សាគោលនយោបាយចំគោលដៅ ការវាយតម្លៃលើលទ្ធភាពនៃតម្រូវការហិរញ្ញវត្ថុ និងផ្តល់ការគាំទ្រផ្នែកហិរញ្ញវត្ថុពាក់ព័ន្ធ រួមទាំងតាមរយៈការផ្តល់ហិរញ្ញប្បទានដែលមានអត្រាការប្រាក់ទាប ឬសូន្យភាគរយ ព្រមទាំងចំណាត់ការកាត់បន្ថយហានិភ័យផ្សេងៗទៀតដែលមិនទាន់ត្រូវបានបញ្ជាក់លម្អិត៕