នាយករដ្ឋមន្រ្តីអង់គ្លេស លោក Keir Starmer បាននិយាយថា ចក្រភពអង់គ្លេស នឹងស្វះស្វែងរកភាពជាដៃគូកាន់តែស៊ីជម្រៅជាមួយសហភាពអឺរ៉ុប ដោយសារតែអស្ថិរភាពដែលបង្កឡើងដោយសង្គ្រាមរបស់សហរដ្ឋអាមេរិកជាមួយអ៊ីរ៉ង់ ដោយបន្ថែមថា ពេលវេលានេះតម្រូវឱ្យមានកិច្ចព្រមព្រៀងដ៏មានមហិច្ឆតាជាងមុនជាមួយទីក្រុងព្រុចសែល ដើម្បីពង្រឹងពាណិជ្ជកម្ម និងវិស័យការពារជាតិ។

ការអត្ថាធិប្បាយនេះ កើតឡើងខណៈលោកប្រធានាធិបតី Donald Trump បាននិយាយម្តងទៀតថា លោកកំពុងពិចារណាដកអាមេរិក ចេញពីអង្គការណាតូ ដែលលោកហៅថាជា «ខ្លាក្រដាស»។ លោក Trump តែងតែរិះគន់ចក្រភពអង់គ្លេស និងបណ្តាប្រទេសនៅអឺរ៉ុប ចំពោះការមិនបានគាំទ្រការវាយប្រហាររវាងអាមេរិក និងអ៊ីស្រាអែល លើអ៊ីរ៉ង់ និងបានរិះគន់យោធារបស់ប្រទេសទាំងនោះ។

នៅក្នុងសន្និសីទសារព័ត៌មានមួយកាលពីថ្ងៃពុធ (១ មេសា) លោក Starmer បានលើកឡើងថា ការបន្តទំនាក់ទំនងកាន់តែជិតស្និទ្ធជាមួយអឺរ៉ុប នឹងមានន័យថា «ភាពជាដៃគូសម្រាប់ពិភពលោកដ៏គ្រោះថ្នាក់មួយ ដែលគ្រប់គ្នាត្រូវតែហែលឆ្លងរួមគ្នា»។ នេះគឺជាសញ្ញាបង្ហាញថា អង់គ្លេសមានបំណងចង់ងាកទៅរកអឺរ៉ុប និងរក្សាគម្លាតពីសហរដ្ឋអាមេរិក។

នាយករដ្ឋមន្រ្តីចក្រភពអង់គ្លេសរូបនេះសង្កត់ធ្ងន់ថា លោកនឹងមិនស្ថិតក្រោមសម្ពាធដោយសារការអត្ថាធិប្បាយរបស់លោក Trump ស្តីពីអង្គការណាតូនោះទេ ហើយថា លោកចង់ធានាដល់ប្រជាជនអង់គ្លេសថា ពួកគេនឹងមិនត្រូវបាន «អូសទាញ» ឱ្យធ្លាក់ចូលក្នុងជម្លោះកាន់តែទូលំទូលាយនោះឡើយ៕