កងទ័ពអ៊ីរ៉ង់ បានប្តេជ្ញានៅថ្ងៃព្រហស្បតិ៍ (២ មេសា) នេះថា ខ្លួននឹងវាយបកកាន់តែខ្លាំងក្លាបំផុតប្រឆាំងនឹងសហរដ្ឋអាមេរិក និងអ៊ីស្រាអែល បន្ទាប់ពីលោកប្រធានាធិបតីអាមេរិក ដូណាល់ ត្រាំ បានគំរាមកំហែងទម្លាក់គ្រាប់បែកកម្ទេចប្រទេសនេះឱ្យដូចជា «យុគសម័យថ្ម» ក្នុងប៉ុន្មានសប្តាហ៍ខាងមុខ។

ទីបញ្ជាការប្រតិបត្តិការយោធា Khatam Al-Anbiya របស់អ៊ីរ៉ង់ បានលើកឡើងនៅក្នុងសេចក្តីថ្លែងការណ៍មួយដែលផ្សព្វផ្សាយដោយទូរទស្សន៍រដ្ឋថា៖ «សង្គ្រាមនេះនឹងបន្តរហូតដល់ពួកគេរងនូវភាពអាម៉ាស់ បាក់មុខ សោកស្តាយជាអចិន្ត្រៃយ៍ និងពិតប្រាកដ រួមទាំងការចុះចាញ់ផងដែរ។ ចូររង់ចាំមើលសកម្មភាពវាយបករបស់អ៊ីរ៉ង់ដែលកាន់តែខ្លាំងក្លា កាន់តែទូលំទូលាយ និងកាន់តែបំផ្លិចបំផ្លាញ»។

ក្នុងសុន្ទរកថាពិសេសស្របពេលតម្លៃប្រេងពិភពលោកកំពុងឡើងខ្ពស់ លោក Trump បានព្រមានថា យោធានឹង «បញ្ចប់ការងារ» នៅអ៊ីរ៉ង់ឆាប់ៗនេះ ដោយសារ «គោលដៅយុទ្ធសាស្ត្រស្នូលជិតសម្រេចទាំងស្រុងហើយ» ហើយលោកក៏សង្កត់ធ្ងន់ជាថ្មីនូវការគំរាមកម្ទេចសាធារណរដ្ឋអ៊ិស្លាមមួយនេះ ឱ្យត្រឡប់ទៅយុគសម័យថ្មវិញ ក្នុងពេលពីរទៅបីសប្តាហ៍ខាងមុខ។

ទាក់ទងនឹងលទ្ធភាពបញ្ចប់ជម្លោះ អ៊ីរ៉ង់បាននិយាយថា ការទាមទាររបស់សហរដ្ឋអាមេរិកគឺ «ហួសហេតុ និងមិនសមហេតុផល» ហើយបានបដិសេធថា មិនមានការចរចាណាមួយកំពុងដំណើរការសម្រាប់បទឈប់បាញ់ដើម្បីបញ្ចប់សង្គ្រាមនៅមជ្ឈិមបូព៌ានោះទេ។ កងឆ្មាំបដិវត្តន៍អ៊ីរ៉ង់នៅតែទទូចថា ច្រកសមុទ្រហ័រមូស នឹងនៅតែបន្តបិទចំពោះ «សត្រូវ» ខណៈលោក Trump និយាយថា ពេលចប់សង្រ្គាម ច្រកសមុទ្រហ័រមូសដ៏សំខាន់នឹងបើកឡើងវិញដោយឯកឯង៕