ភ្នំពេញ៖ ក្រសួងបរិស្ថានប្រកាសថា កាលពីឆ្នាំ២០២១ កន្លងទៅនេះ អន្ទាក់ចំនួន ៦១.៦១១ អន្ទាក់ ត្រូវបានមន្ត្រីឧទ្យានុរក្ស និងប្រជាសហគមន៍តំបន់ការពារធម្មជាតិដោះចេញពីតំបន់ការពារធម្មជាតិ និងរបៀងអភិរក្សជីវៈចម្រុះទាំង ៧៦ នៅកម្ពុជាដែលស្ថិតក្រោមការ គ្រប់គ្រង និងអភិរក្សរបស់ក្រសួងបរិស្ថាន។

ក្រសួងបរិស្ថាន ប្រកាសថា អន្ទាក់ជាឃាតកលាក់មុខសម្លាប់ព្រៃជារៀងរាល់ថ្ងៃ។ ប្រសិនបើ អន្ទាក់ទាំងនេះ មិនត្រូវបានដោះ និងបំផ្លាញចោលទេ ជីវិតសត្វព្រៃជាច្រើន នឹងត្រូវបានសម្លាប់​ដោយ​អន្ទាក់ព្រានព្រៃ។

លោកអ្នកអាចបញ្ឈប់ការដាក់អន្ទាក់បាន ដោយនិយាយថាទេ ចំពោះសាច់សត្វព្រៃ កុំ​បរិភោគ​សាច់សត្វព្រៃ​ និងកុំជួញដូរសាច់សត្វព្រៃ។ ​សត្វព្រៃទាំងនេះ មានតម្លៃតិចតួចជាសាច់ តែវាពិតជា​មានតម្លៃធំធេងសម្រាប់ជីវៈចម្រុះ​ និងប្រព័ន្ធអេកូឡូស៊ី ​និងមាន​តម្លៃ​សម្រាប់ការអភិរក្ស ព្រោះ​ប្រភេទ​សត្វមួយចំនួនដែលជាប់អន្ទាក់ព្រាន ជាប្រភេទសត្វកម្រ​ជិត​ផុតពូជ​នៅ​លើ​ពិភពលោក៕