ភ្នំពេញ៖ នៅរសៀលថ្ងៃទី១ ខែមេសានេះលោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) អមដោយថ្នាក់ដឹកនាំ និងមន្ត្រីសុខាភិបាលមួយចំនួនទៀត បានទទួលជួបសំដែងការគួរសម ជាមួយលោកស្រី ណាឌីយ៉ា ឡាស្រ៊ី (Nadia Lasri) ប្រធានគ្រប់គ្រងជាន់ខ្ពស់របស់អង្គការ GAVI និងមជ្ឈមណ្ឌលកូវ៉ាក់ (COVAX) ប្រចាំប្រទេសកម្ពុជា និងប្រទេសឡាវ ប្រចាំការិយាល័យកណ្តាលនៅទីក្រុងហ្សឺណែវ ប្រទេសស្វីស លោកស្រី រីលី អាក់ (Reillie Acks) ប្រធានកម្មវិធី GAVI និងមជ្ឈមណ្ឌលកូវ៉ាក់ (COVAX) ប្រចាំការិយាល័យកណ្តាលនៅទីក្រុងហ្សឺណែវ ប្រទេសស្វីស លោកស្រីវេជ្ជបណ្ឌិត លី អាយលែន (Li Ailian) តំណាងអង្គការសុខភាពពិភពលោក (WHO) ប្រចាំកម្ពុជា លោកស្រី ហ្វូរ៉ូហ្វ ហ្វូយូហ្សាត (Foroogh Foyouzat) តំណាងអង្គការ UNICEF ប្រចាំកម្ពុជា លោកស្រី សូលែន ស្កត់នី (Soleine Scotney) និងតំណាងអង្គការពាក់ព័ន្ឋផ្សេងៗមួយចំនួនទៀត។

កិច្ចពិភាក្សានេះ ធ្វើឡើងនៅទីស្តីការក្រសួងសុខាភិបាល ក្នុងគោលបំណងសិក្សាស្វែងយល់អំពីប្រព័ន្ធសុខាភិបាលកម្ពុជា ពិភាក្សាអំពីកិច្ចសហប្រតិបត្តិការក្នុងវិស័យសុខាភិបាល ជាពិសេសការងារវ៉ាក់សាំងបង្ការជំងឺរួមទាំងវ៉ាក់សាំងកូវីដ-១៩ នៅកម្ពុជាផងដែរ។