កាលពីថ្ងៃពុធ (ទី១ ខែមេសា ឆ្នាំ២០២៦) ទីក្រុងប៉េកាំង បានរិះគន់ចំណាត់ការរបស់សហរដ្ឋអាមេរិក ក្នុងការចេញ «អាជ្ញាប័ណ្ណពិសេស» ដែលមិនរាប់បញ្ចូលប្រទេសចិន រុស្ស៊ី កូរ៉េខាងជើង អ៊ីរ៉ង់ និងគុយបា ក្នុងប្រតិបត្តិការពាណិជ្ជកម្មជាមួយវ៉េណេស៊ុយអេឡា។

អមដោយការសង្កត់ធ្ងន់លើ «ការការពារផលប្រយោជន៍» នៃប្រទេសសេដ្ឋកិច្ចធំទី ២ របស់ពិភពលោក អ្នកនាំពាក្យក្រសួងការបរទេស លោកស្រី Mao Ning បានប្រាប់អ្នកសារព័ត៌មាននៅទីក្រុងប៉េកាំងថា៖ «ប្រទេសចិនប្រឆាំងយ៉ាងដាច់អហង្ការ ចំពោះការរឹតបន្តឹង លើកិច្ចសហប្រតិបត្តិការចិន-វ៉េណេស៊ុយអេឡា ដោយការចេញនូវអ្វីដែលហៅថា អាជ្ញាប័ណ្ណពិសេស»។

គួរបញ្ជាក់ថា នៅក្នុងចំណាត់ការលើកលែងទណ្ឌកម្មរបស់សហរដ្ឋអាមេរិក ទាក់ទងនឹងវ៉េណេស៊ុយអេឡា កាលពីថ្ងៃអង្គារ ក្រសួងរតនាគារសហរដ្ឋអាមេរិក បានបញ្ជាក់ថា ប្រតិបត្តិការថ្មីនេះ មិនពាក់ព័ន្ធនឹងការកែច្នៃ ឬការចម្រាញ់រ៉ែមានប្រភពដើមពីវេណេស៊ុយអេឡាឡើយ ក្នុងនោះរួមទាំងរ៉ែមាស ហើយក៏មិនរាប់បញ្ចូលរុស្ស៊ី អ៊ីរ៉ង់ កូរ៉េខាងជើង គុយបា និងចិនផងដែរ។

ជំនួសឲ្យការចេញអាជ្ញាប័ណ្ណពិសេសនេះ លោកស្រី Mao បានបញ្ជាក់ថា សហរដ្ឋអាមេរិកគួរតែ «លុបចោលទណ្ឌកម្មជាឯកតោភាគីខុសច្បាប់ លើប្រទេសវ៉េណេស៊ុយអេឡាភ្លាមៗ ជាជាងប្រើប្រាស់នូវអ្វីដែលហៅថា អាជ្ញាប័ណ្ណពិសេស ដើម្បីបិទបាំងចំណាត់របស់ខ្លួន» ដែលមានគោលបំណងរារាំង «ផលប្រយោជន៍ស្របច្បាប់របស់ភាគីផ្សេងទៀត»។

វិធានការចុងក្រោយរបស់រដ្ឋបាលលោកប្រធានាធិបតី Donald Trump នេះ បានកើតឡើងបន្ទាប់ពីកងកម្លាំងអាមេរិក បានឆ្មក់ចូលទីក្រុង Caracas កាលពីខែមករា ដោយបានចាប់ខ្លួនប្រធានាធិបតីវ៉េណេស៊ុយអេឡា លោក Nicolas Maduro រួមជាមួយភរិយារបស់លោក គឺលោកស្រី Cilia Flores ដែលត្រូវបានឃុំខ្លួននៅទីក្រុង New York ពីបទចោទប្រកាន់ជាច្រើន រួមទាំងការជួញដូរគ្រឿងញៀន និងបទល្មើសទាក់ទងនឹងអាវុធ។ អ្នកទាំង២ បានបដិសេធការចោទប្រកាន់ទាំងនោះ៕