​​អ៊ុយ​ក្រែ​ន៖ ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​និយាយ​កាលពី​ថ្ងៃ​ព្រហស្បតិ៍​ថា ប្រទេស​រុស្ស៊ី​កំពុង​ប្រមូលផ្តុំ​កម្លាំង​សម្រាប់​ការវាយប្រហារ​ខ្លាំងក្លា​លើ​តំបន់ Donbas។​

​នៅក្នុង​សុន្ទរកថា​វីដេអូ​ប្រចាំថ្ងៃ​របស់លោក លោក Zelenskyy បាន​និយាយថា កងកម្លាំង​អ៊ុយ​ក្រែ​នបាន​នឹង​កំពុង​វាយ​រុញច្រាន​កងទ័ព​រុស្ស៊ី​នៅ​ភាគ​ខាងជើង​ទីក្រុង​គី​វ ប៉ុន្តែ​បាន​ព្រមាន​ថា ​ពេលនេះពួកគេ​កំពុង​ប្រមូល​កម្លាំង​ធនធាន​នៅក្នុង​ទីក្រុង Mariupol ក្នុងទិសដៅសម្រាប់​ការវាយប្រហារ​ដ៏មាន​ឥទ្ធិពល​មក​ទីក្រុង ​Kharkiv និង​តំបន់ Donbas។​ ​លោក Zelenskyy បាន​អះអាងថា រុស្ស៊ី​កំពុង​ព្យាយាម​បង្កើត​អង្គភាព​របស់​ពួកគេ​នៅក្នុងទីក្រុង Kherson ដែល​គ្រប់គ្រង​ដោយ​កងកម្លាំង​រុស្ស៊ី បន្ទាប់ពី​មាន​របាយការណ៍​អំពីផែនការ​របស់វិមាន​ក្រឹម​ឡាំង​ ដើម្បី​ធ្វើ​ប្រជាមតិ​ឯករាជ្យ​នៅក្នុង​តំបន់​។​

​លោក Zelenskyy បាន​ថ្លែងអំណរគុណ​ដល់​ប្រទេស​ទួរគី ចំពោះ​អ្វីដែល​លោក​បាននិយាយថា ​គឺជាការ​ត្រៀមខ្លួន​ដើម្បី​ក្លាយជា​អ្នកធានា​សន្តិសុខសម្រាប់​អ៊ុយ​ក្រែ​ន​។​ ​ប្រធានាធិបតី​អ៊ុយ​ក្រែ​ន​លោក Volodymyr Zelenskyy បាន​ចោទប្រកាន់​រុស្ស៊ី​ថា បាន​បិទច្រករបៀង​មនុស្សធម៌​ពី​ទីក្រុង Mariupol ដែល​ត្រូវ​ឡោមព័ទ្ធ​។ លោក Zelenskyy នៅក្នុងវីដេអូ​ថ្លែងទៅកាន់​សភា​ប្រទេស​បែលហ្ស៊ិក បានស្នើ​សុំឱ្យ​សមាជិកសភា​ជួយ​បន្ថែមទៀត ​និង​បាន​រិះគន់​ការបន្ត​នូវ​លំហូរ​ពេជ្រ​រុស្ស៊ី​ទៅកាន់​កំពង់ផែ Antwerp របស់​ប្រទេសបែលហ្ស៊ិក៕

អត្ថបទ៖ ប៊ុនថន