អតីតរដ្ឋមន្ត្រីការបរទេសអ៊ីរ៉ង់ លោក Kamal Kharazi បានរងរបួសធ្ងន់ ក្នុងការប៉ុនប៉ងធ្វើឃាតដែលបានសម្លាប់ភរិយារបស់លោក ខណៈការវាយប្រហាររបស់សហរដ្ឋអាមេរិក និងអ៊ីស្រាអែល នៅតែបន្តវាយប្រហារលើអ៊ីរ៉ង់ រយៈពេលប្រាំសប្តាហ៍មកនេះ។

ប្រព័ន្ធផ្សព្វផ្សាយអ៊ីរ៉ង់នៅថ្ងៃព្រហស្បតិ៍នេះបានរាយការណ៍ថា លំនៅឋានរបស់លោក Kharazi នៅទីក្រុងតេអេរ៉ង់ ត្រូវបានកំណត់គោលដៅកាលពីថ្ងៃមុនក្នុងការវាយប្រហារតាមអាកាស។ មន្ត្រីរូបនេះ ត្រូវបានបញ្ជូនទៅមន្ទីរពេទ្យដោយសាររងរបួសធ្ងន់។

សារព័ត៌មាន Al Jazeera បានរាយការណ៍ពីទីក្រុងតេអេរ៉ង់ថា «យើងបានឃើញអ្វីដែលមើលទៅទំនងជាការប៉ុនប៉ងធ្វើឃាតលើអតីតរដ្ឋមន្ត្រីការបរទេស លោក Kamal Kharazi ដោយយើងពុំដឹងថាហេតុអ្វីបានជាលោកត្រូវបានគេកំណត់គោលដៅនោះទេ។ លោកបានរងរបួសធ្ងន់ ហើយភរិយារបស់លោកបានស្លាប់»។

ការវាយប្រហារតាមអាកាសត្រូវបានរាយការណ៍នៅថ្ងៃព្រហស្បតិ៍នេះនៅទូទាំងប្រទេសអ៊ីរ៉ង់ រួមទាំងនៅទីក្រុងតេអេរ៉ង់ ទីក្រុងអ៊ីស្វាហាន និងទីក្រុងស៊ីរ៉ាស។ មនុស្សបួននាក់ត្រូវបានរាយការណ៍ថា បានស្លាប់នៅឡារ៉េស្ថាន ភាគខាងត្បូងប្រទេសអ៊ីរ៉ង់។

ទន្ទឹមនឹងនេះ អ្នកនាំពាក្យនៃទីបញ្ជាការបង្រួបបង្រួមកងកម្លាំងប្រដាប់អាវុធ បាននិយាយថា ទីក្រុងតេអេរ៉ង់នឹងបន្តធ្វើសង្គ្រាមនៅមជ្ឈិមបូព៌ារហូតដល់សហរដ្ឋអាមេរិកនិងអ៊ីស្រាអែល ប្រឈមនឹង «ភាពសោកស្តាយ និងការចុះចាញ់ជាអចិន្ត្រៃយ៍» នេះបើយោងតាមរបាយការណ៍របស់ទីភ្នាក់ងារសារព័ត៌មានពាក់កណ្តាលផ្លូវការ Tasnim។