ប្រទេសប៉ាគីស្ថាន នៅថ្ងៃព្រហស្បតិ៍ (ទី២ ខែមេសា ឆ្នាំ២០២៦) នេះ បានបញ្ជាក់ថា បន្ទុកនៃការបញ្ចប់ជម្លោះរបស់ខ្លួន ជាមួយអាហ្វហ្គានីស្ថាន គឺស្ថិតនៅលើទីក្រុងកាប៊ុល ខណៈដែលភាគីទាំង២ បានបើកកិច្ចចរចាបឋម ដើម្បីព្យាយាមបញ្ចប់អរិភាព។

ប្រទេសជិតខាងទាំង២ និងធ្លាប់ជាសម្ព័ន្ធមិត្ត បានកំពុងជាប់នៅក្នុងជម្លោះដែលកំពុងតានតឹង ជុំវិញការអះអាងពីទីក្រុងអ៊ីស្លាម៉ាបាដ ដែលថា ទីក្រុងកាប៊ុលកំពុងផ្តល់ជម្រកដល់ក្រុមជ្រុលនិយមដែលត្រូវទទួលខុសត្រូវ ចំពោះការវាយប្រហារឆ្លងព្រំដែន។

ការចរចាបានចាប់ផ្តើមនៅទីក្រុង Urumqi ភាគពាយ័ព្យប្រទេសចិន កាលពីថ្ងៃទី១ ខែមេសា បន្ទាប់ពីរដ្ឋមន្ត្រីការបរទេសប៉ាគីស្ថាន លោក Ishaq Dar បានធ្វើដំណើរទៅកាន់ទីក្រុងប៉េកាំង ដើម្បីពិភាក្សាជាមួយសមភាគីចិន លោក Wang Yi។

អ្នកនាំពាក្យក្រសួងការបរទេសប៉ាគីស្ថាន លោក Tahir Hussain Andrabi បានប្រាប់អ្នកសារព័ត៌មាននៅក្នុងរដ្ឋធានីថា រដ្ឋាភិបាលសង្ឃឹមថា នឹងមាននូវ «ដំណោះស្រាយយូរអង្វែង»។ លោកបាននិយាយថា៖ «ការចូលរួមរបស់យើង (ក្នុងការចរចា) គឺជាការបញ្ជាក់ឡើងវិញនូវកង្វល់ស្នូលរបស់យើង។ តែទោះជាយ៉ាងណាក្ដី បន្ទុក ឬភារកិច្ចនៃដំណើរការពិតប្រាកដ គឺស្ថិតនៅលើប្រទេសអាហ្វហ្គានីស្ថាន ដែលត្រូវតែបង្ហាញពីវិធានការប្រចក្ស និងអាចផ្ទៀងផ្ទាត់បាន លើក្រុមភេរវករដែលប្រើប្រាស់ទឹកដីរបស់ខ្លួន ប្រឆាំងនឹងប៉ាគីស្ថាន»។

ប៉ាគីស្ថាន ដែលមានទាំងទំនាក់ទំនងយូរអង្វែងជាមួយអ៊ីរ៉ង់ និងទំនាក់ទំនងផ្ទាល់ខ្លួនជាមួយរដ្ឋបាលរបស់លោកប្រធានាធិបតី Donald Trump ក្នុងរយៈពេលប៉ុន្មានសប្តាហ៍ថ្មីៗនេះ បានចូលរួមក្នុងកិច្ចប្រឹងប្រែងផ្នែកការទូត ដើម្បីព្យាយាមនាំទីក្រុងវ៉ាស៊ីនតោន និងតេអេរ៉ង់ ទៅកាន់តុចរចា ដើម្បីបញ្ចប់សង្គ្រាមរបស់ភាគីទាំង២ នៅតំបន់មជ្ឈិមបូព៌ា៕