ប្រធានាធិបតីអាមេរិក លោក Donald Trump បានបង្កឲ្យមានកំហឹង នៅប្រទេសបារាំង នាថ្ងៃព្រហស្បតិ៍ (ទី២ ខែមេសា ឆ្នាំ២០២៦) នេះ បន្ទាប់ពីបានប្រើសម្ដីលេងសើចបែបចំអកឲ្យប្រធានាធិបតីបារាំង និងភរិយារបស់លោក ដោយធ្វើត្រាប់តាមការបញ្ចេញសំឡេងជនជាតិបារាំង និងនិយាយថា ភរិយារបស់លោក Emmanuel Macron «ប្រព្រឹត្តមិនល្អសោះដាក់ស្វាមី»។

កាលពីថ្ងៃទី១ ខែមេសា ប្រធានាធិបតីអាមេរិក បានបញ្ចេញពាក្យប្រមាថចុងក្រោយរបស់លោក ចំពោះលោក Macron ក្នុងអំឡុងពេលអាហារថ្ងៃត្រង់ឯកជន ខណៈដែលលោកបានរិះគន់សម្ព័ន្ធមិត្តណាតូ (NATO) ដែលមិនចូលរួមក្នុងសង្គ្រាម ប្រឆាំងនឹងអ៊ីរ៉ង់។ នៅប្រទេសបារាំង អ្នកនយោបាយ រួមទាំងអ្នករិះគន់លោក Macron ផងដែរ មានការខឹងសម្បាយ៉ាងខ្លាំង ចំពោះសម្ដីរិះគន់របស់លោក Trump។

ប្រធានសភាជាន់ទាបបារាំង លោកស្រី Yael Braun-Pivet បាននិយាយថា៖ «និយាយដោយត្រង់ចុះ វាគឺមិនល្អនោះទេ»។ លោកស្រីបានប្រាប់ប្រព័ន្ធផ្សព្វផ្សាយ Franceinfo ថា៖ «យើងកំពុងពិភាក្សា អំពីអនាគតរបស់ពិភពលោក។ ឥឡូវនេះ នៅក្នុងប្រទេសអ៊ីរ៉ង់ រឿងនេះកំពុងមានផលវិបាក ចំពោះជីវិតមនុស្សរាប់លាននាក់ មនុស្សកំពុងស្លាប់នៅសមរភូមិ ហើយយើងមានប្រធានាធិបតីដែលកំពុងនិយាយលេងសើច ដែលកំពុងចំអកឲ្យអ្នកដទៃ»។

សូម្បីតែលោក Manuel Bompard អ្នកសម្របសម្រួលរបស់គណបក្សឆ្វេងនិយមជ្រុល France Unbowed ក៏បានប្រញាប់ប្រញាល់ការពារលោក Macron ផងដែរ។ លោក Bompard បានប្រាប់ប្រព័ន្ធផ្សព្វផ្សាយ BFMTV ថា៖ «អ្នកបានដឹងហើយ អំពីវិសាលភាពនៃភាពមិនចុះសម្រុងគ្នា រវាងខ្ញុំ និងប្រធានាធិបតី ប៉ុន្តែចំពោះលោក Donald Trump ដែលនិយាយដាក់លោកបែបនោះ និងនិយាយអំពីភរិយារបស់លោក តាមរបៀបបែបនេះ ខ្ញុំយល់ថា វាមិនអាចទទួលយកបានទាំងស្រុង»។

លោក Trump បានចំអកឲ្យលោក Macron អាយុ ៤៨ឆ្នាំ តាមរយៈវីដេអូមួយដែលបានបង្ហោះមួយភ្លែត នៅលើឆាណែល YouTube របស់សេតវិមាន មុនពេលការចូលទៅមើលត្រូវបានបិទ។ មេដឹកនាំអាមេរិក កំពុងសំដៅទៅលើវីដេអូព័ត៌មាន ក្នុងខែឧសភា ឆ្នាំ២០២៥ ដែលហាក់ដូចជាបង្ហាញឲ្យឃើញលោកស្រី Brigitte Macron កំពុងរុញមុខប្រធានាធិបតីបារាំង ក្នុងដំណើរកម្សាន្តទៅកាន់ប្រទេសវៀតណាម ដែលក្រោយមកលោក Macron បានបដិសេធថា ជាផ្នែកមួយនៃយុទ្ធនាការផ្សព្វផ្សាយព័ត៌មានមិនពិត៕