នៅថ្ងៃព្រហស្បតិ៍ (ទី២ ខែមេសា ឆ្នាំ២០២៦) នេះ ប្រទេសចិនបានឲ្យដឹងថា ការវាយប្រហាររបស់សហរដ្ឋអាមេរិក និងអ៊ីស្រាអែល លើអ៊ីរ៉ង់ គឺជា «ដើមហេតុដ៏ធំ» ដែលនាំទៅដល់ការបិទច្រកសមុទ្រ Hormuz បន្ទាប់ពីប្រធានាធិបតីអាមេរិក លោក Donald Trump បានអំពាវនាវឲ្យប្រទេសដែលរងផលប៉ះពាល់ដណ្ដើមយកផ្លូវទឹកដ៏សំខាន់នេះវិញ។

លោក Trump បាននិយាយថា ប្រទេសដែលទទួលបានប្រេងតាមរយៈច្រកសមុទ្រ Hormuz គួរតែ «ថែរក្សាផ្លូវនោះ» ដែលត្រូវបានបិទដោយទីក្រុងតេអេរ៉ង់ ដើម្បីសងសឹកចំពោះការវាយប្រហាររបស់សហរដ្ឋអាមេរិក-អ៊ីស្រាអែល លើអ៊ីរ៉ង់។ លោកបានជំរុញដល់ប្រទេសនានាឲ្យ «ដណ្ដើមយកវា (ច្រកសមុទ្រ) ការពារវា ប្រើប្រាស់វា សម្រាប់ខ្លួនឯង»។

ចិន គឺជាប្រទេសនាំចូលប្រេងដ៏ធំមួយ តាមរយៈផ្លូវទឹកដ៏សំខាន់នេះ ហើយក្រសួងការបរទេស នៅទីក្រុងប៉េកាំង បានដាក់ការទទួលខុសត្រូវទៅលើសហរដ្ឋអាមេរិក និងអ៊ីស្រាអែលនៅថ្ងៃទី២ ខែមេសានេះ។ អ្នកនាំពាក្យក្រសួង លោកស្រី Mao Ning បានប្រាប់សន្និសីទសារព័ត៌មានមួយថា៖ «ដើមហេតុធំនៃការរំខានដល់ការធ្វើនាវាចរណ៍ តាមរយៈច្រកសមុទ្រ Hormuz គឺប្រតិបត្តិការយោធាខុសច្បាប់របស់សហរដ្ឋអាមេរិក និងអ៊ីស្រាអែល លើអ៊ីរ៉ង់»។

បើទោះបីជាលោកបានព្យាយាមធានាថា ជម្លោះជិតដល់ទីបញ្ចប់ហើយក្ដី ក៏លោក Trump បានព្រមាននៅក្នុងសុន្ទរកថាតាមទូរទស្សន៍ថា នឹងមានការវាយប្រហារយ៉ាងខ្លាំងក្លារយៈពេលពី ២ ទៅ ៣សប្តាហ៍» ទៀត ដែលនឹង «នាំ (អ៊ីរ៉ង់) ឲ្យវិលត្រឡប់ទៅកាន់យុគសម័យថ្មរំលីង»។ 

នៅពេលត្រូវបានសួរ អំពីការគំរាមកំហែងរបស់លោក Trump លោកស្រី Mao បានឆ្លើយតបទៅអ្នកសារព័ត៌មានថា៖ «មធ្យោបាយយោធាមិនអាចដោះស្រាយបញ្ហាជាមូលដ្ឋានបានទេ ហើយការបង្កើនជម្លោះមិនផ្ដល់ផលប្រយោជន៍ដល់ភាគីណាមួយឡើយ»៕