ក្រសួងប្រេង បានឲ្យដឹងថា ប្រទេសអ៊ីរ៉ាក់បានចាប់ផ្តើមនាំចេញប្រេងឆៅ ដោយប្រើរថយន្តដឹកប្រេងឆ្លងកាត់ស៊ីរី ដោយនេះជាលើកដំបូងក្នុងរយៈជាង ១ខែ នៅក្នុងសង្គ្រាមដែលបានបង្កការប៉ះពាល់យ៉ាងធ្ងន់ធ្ងរដល់ទីផ្សារថាមពល។

ក្នុងនាមជាសមាជិកស្ថាបនិកនៃក្រុម OPEC (អង្គការនៃប្រទេសនាំចេញប្រេង) អ៊ីរ៉ាក់ពឹងផ្អែកយ៉ាងខ្លាំងលើការនាំចេញប្រេង ដែលមានចំនួនប្រហែល ៩០ភាគរយនៃប្រាក់ចំណូលថវិការបស់ខ្លួន។

នៅមុនមានការវាយប្រហារ និងការគំរាមកំហែងរបស់អ៊ីរ៉ង់ ដែលស្ទើរតែបិទច្រកសមុទ្រ Hormuz ដើម្បីសងសឹក ចំពោះការវាយប្រហាររបស់សហរដ្ឋអាមេរិក-អ៊ីស្រាអែល អ៊ីរ៉ាក់បាននាំចេញប្រេងភាគច្រើនរបស់ខ្លួនតាមរយៈផ្លូវទឹកយុទ្ធសាស្ត្រនេះ។

មិនខុសពីប្រទេសនាំចេញប្រេងផ្សេងទៀតនៅក្នុងតំបន់ដែរ អ៊ីរ៉ាក់ត្រូវបានទុកឲ្យស្វែងរកផ្លូវជំនួស ហើយនៅក្នុងសេចក្តីថ្លែងការណ៍មួយ កាលពីយប់ថ្ងៃពុធ ក្រសួងប្រេងបានបញ្ជាក់ថា ខ្លួន «បានចាប់ផ្តើមនាំចេញប្រេងដោយរថយន្តដឹកប្រេងឆ្លងកាត់ប្រទេសជិតខាងស៊ីរី»។

សេចក្ដីថ្លែងការណ៍បានបន្ថែមថា ស៊ីរីនឹង «ធានាការឆ្លងកាត់ដោយសុវត្ថិភាព» សម្រាប់ការដឹកជញ្ជូនប្រេងនេះ ហើយបានបន្ថែមថា ការនាំចេញនឹងកើនឡើង «បន្តិចម្តងៗ» តែមិនបានផ្តល់ព័ត៌មានលម្អិតបន្ថែមឡើយ។

ប្រភពមួយនៅក្នុងវិស័យប្រេងអ៊ីរ៉ាក់ បានប្រាប់សារព័ត៌មាន AFP ថា ក្នុងចំណោមរថយន្តដឹកប្រេងចំនួន ២៩៩គ្រឿងដែលបានគ្រោងទុក «រថយន្តដឹកប្រេង ១៧៨គ្រឿងដែលផ្ទុកប្រេងឥន្ធនៈ» បានទៅដល់រោងចក្រចម្រាញ់ប្រេងនៅទីក្រុងកំពង់ផែ Baniyas នៅសមុទ្រមេឌីទែរ៉ាណេហើយ ដែលជាផ្នែកមួយនៃ «ដំណាក់កាលដំបូងសម្រាប់ការនាំចេញ»៕