នៅថ្ងៃព្រហស្បតិ៍នេះ អ៊ីរ៉ង់បានគំរាមវាយកម្ទេចសហរដ្ឋអាមេរិក និងអ៊ីស្រាអែល ជាមួយនឹងការបាញ់មីស៊ីលលើទីក្រុងតែល អាវីវ ក្រោយប្រធានាធិបតីសហរដ្ឋអាមេរិកលោក Donald Trump សន្យាទម្លាក់គ្រាប់បែកលើសាធារណរដ្ឋអ៊ិស្លាមឲ្យវិលត្រឡប់ទៅរកយុគសម័យថ្មវិញ ។

សង្រ្គាមដែលបានផ្ទុះឡើងកាលពីរយៈពេលជាង ១ខែមុន ជាមួយនឹងការវាយប្រហាររបស់សហរដ្ឋអាមេរិក-អ៊ីស្រាអែលលើអ៊ីរ៉ង់ បានរីករាលដាលពេញតំបន់មជ្ឈិមបូព៌ា និងបានធ្វើឲ្យប៉ះពាល់ដល់សេដ្ឋកិច្ចសកល និងមនុស្សរាប់រយលាននាក់នៅទូទាំងពិភពលោក ។

ក្នុងសុន្ទរកថានៅសេតវិមាន លោក Trumpនិយាយថា សហរដ្ឋអាមេរិកជិតសម្រេចបានគោលដៅរបស់ខ្លួនហើយ ប៉ុន្តែលោកបានព្រមានថា ការវាយប្រហារនឹងកាន់តែខ្លាំងក្លា បើសិនជាអ៊ីរ៉ង់មិនឈានដល់ដំណោះស្រាយចរចាទេនោះ ។

នៅក្នុងសុន្ទរកថារយៈពេល ១៩នាទីនៅមុខទង់ជាតិអាមេរិក លោក Trumpនិយាយថា នៅរយៈពេល ២-៣សប្តាហ៍ទៀត ពួកយើងនឹងធ្វើឲ្យពួកគេវិលត្រឡប់ទៅកាន់យុគសម័យថ្មវិញ ជាទីកន្លែងរបស់ពួកគេ ។

អ៊ីរ៉ង់បានឆ្លើយតបភ្លាមៗ ក្នុងនោះប្រព័ន្ធការពារដែនអាកាសអ៊ីស្រាអែលចាប់ផ្តើមដំណើរការ ហើយនគរបាលឆ្លើយតបទៅកាន់ទីតាំងរងផលប៉ះពាល់ជាច្រើន ពេលដែលមនុស្ស ៤នាក់ ត្រូវបានគេរាយការណ៍ថា រងរបួសស្រាលនៅទីក្រុងតែល អាវីវ ។

ទីបញ្ជាការយោធាអ៊ីរ៉ង់ Khatam Al-Anbiya បានចេញសេចក្តីថ្លែងការណ៍នៅលើកញ្ចក់ទូរទស្សន៍រដ្ឋដោយព្រមានថា សហរដ្ឋអាមេរិក និងអ៊ីស្រាអែលរង់ចាំការកម្ទេចច្រើនជាងនេះ ទ្រង់ទ្រាយធំជាងនេះ និងបំផ្លិចបំផ្លាញខ្លាំងជាងនេះ ។

សេចក្តីថ្លែងការណ៍បន្តថា ជាមួយនឹងទំនុកចិត្តលើព្រះដ៏មានឫទ្ធានុភាពបំផុត សង្រ្គាមមួយនេះនឹងបន្តរហូតដល់ភាពអាម៉ាស់របស់អ្នក ការសោកស្តាយជារៀងរហូត និងការសុំចុះចាញ់របស់អ្នក ៕