ប្រទេសរាប់សិបដែលមានការព្រួយបារម្ភបានស្វែងរកវិធីដើម្បីចាប់ផ្តើមការដឹកជញ្ជូនថាមពលសំខាន់ៗឡើងវិញតាមរយៈច្រកសមុទ្រ Hormuz កាលពីថ្ងៃព្រហស្បតិ៍ ២ មេសាសប្ដាហ៍នេះ បន្ទាប់ពីប្រធានាធិបតីអាមេរិកលោក Donald Trump បានសន្យាថានឹងវាយប្រហារកាន់តែខ្លាំងលើអ៊ីរ៉ង់ ដែលជំរុញឱ្យតម្លៃប្រេងឡើងថ្លៃឡើងវិញ ដោយផ្ដល់ការលំបាកបន្ថែមទៀតដល់អ្នកប្រើប្រាស់។

លោក Trump បាននិយាយថា ប្រតិបត្តិការនឹងត្រូវបានពង្រីកបន្ថែម ហើយពុំបានផ្តល់ពេលវេលាសម្រាប់ការបញ្ចប់អរិភាពនោះទេ ដោយទាក់ទាញការគំរាមកំហែងសងសឹកពីទីក្រុងតេអេរ៉ង់ និងធ្វើឱ្យតម្លៃភាគហ៊ុនធ្លាក់ចុះ។

លោក Trump បានថ្លែងនៅក្នុងសុន្ទរកថាកាលពីល្ងាចថ្ងៃពុធ ១មេសាសប្ដាហ៍នេះថាពួកលោកនឹងវាយកម្ទេចពួកគេក្នុងរយៈពេលពីរទៅបីសប្តាហ៍ខាងមុខ។ពួកលោកនឹងនាំពួកគេត្រឡប់ទៅយុគថ្មបំបែកវិញ ដែលជាកន្លែងរបស់ពួកគេនៅ។

លោក Trump បានបន្តការគំរាមកហែងកាលពីថ្ងៃព្រហស្បតិ៍ ២មេសា សប្ដាហ៍នេះ ដោយនិយាយនៅលើបណ្ដាញសង្គម Truth Social ថា ដល់ពេលហើយសម្រាប់អ៊ីរ៉ង់ដើម្បីធ្វើកិច្ចព្រមព្រៀងមុនពេលវាយឺតពេល។

ទោះជាយ៉ាងណាក៏ដោយ ប្រទេសនៅអឺរ៉ុប និងរដ្ឋដទៃទៀតបាននិយាយថា ពួកគេនឹងជួយធានាសុវត្ថិភាពច្រកសមុទ្រនេះ លុះត្រាតែមានបទឈប់បាញ់។

ចក្រភពអង់គ្លេសបានធ្វើជាប្រធានកិច្ចប្រជុំតាមអនឡាញរបស់ប្រទេសប្រមាណ ៤០ ដើម្បីស្វែងយល់ពីវិធីស្តារសេរីភាពនៃការធ្វើនាវាចរណ៍ឡើងវិញ ដោយនិយាយថា ការផ្តោតសំខាន់គឺទៅលើឧបករណ៍ការទូត និងសេដ្ឋកិច្ច។ចំណែកប្រធានាធិបតីបារាំងលោក Emmanuel Macron វិញបាននិយាយថា វាមិនប្រាកដទេក្នុងការបើកច្រកសមុទ្រ Hormuz ដោយកម្លាំង នោះ ។លោកថា វាអាចធ្វើបានលុះត្រាតែមានការពិគ្រោះយោបល់ជាមួយអ៊ីរ៉ង់៕