ក្រុមអ្នកការទូតបានប្រាប់ប្រព័ន្ធផ្សព្វផ្សាយថា ក្រុមប្រឹក្សាសន្តិសុខអង្គការសហប្រជាជាតិ (UNSC) គ្រោងបោះឆ្នោតនៅថ្ងៃសុក្រ ទី៣ ខែមេសា នេះ លើសេចក្តីសម្រេចមួយដែលស្នើឡើងដោយប្រទេសបារ៉ែន ដើម្បីការពារការដឹកជញ្ជូនពាណិជ្ជកម្មទាំងក្នុង និងជុំវិញច្រកសមុទ្រហ័រមូស ប៉ុន្តែប្រទេសចិន ដែលមានអំណាចវ៉េតូ បានបង្ហាញជំហរយ៉ាងច្បាស់ថា ខ្លួនប្រឆាំងនឹងការអនុញ្ញាតឱ្យមានការប្រើប្រាស់កម្លាំងបាយណាមួយ។

តម្លៃប្រេងក្នុងទីផ្សារពិភពលោកបានហក់ឡើងខ្ពស់ ចាប់តាំងពីសហរដ្ឋអាមេរិក និងអ៊ីស្រាអែល បានវាយប្រហារលើអ៊ីរ៉ង់ កាលពីចុងខែកុម្ភៈមក ដែលបង្កឱ្យមានជម្លោះអូសបន្លាយពេលជាងមួយខែមកនេះ និងបានធ្វើឱ្យច្រកសមុទ្រហ័រមូសដ៏សំខាន់ត្រូវបិទជិតចំពោះចរាចរណ៍ដឹកជញ្ជូនតាមនាវា។

ក្រុមអ្នកការទូតបានបញ្ជាក់ប្រាប់ទីភ្នាក់ងារសារព័ត៌មានរ៉យទ័រថា បារ៉ែន ដែលបច្ចុប្បន្នជាប្រធានប្តូរវេននៃសមាជិកក្រុមប្រឹក្សាសន្តិសុខទាំង ១៥ប្រទេស បានសម្រេចចុងក្រោយលើសេចក្តីព្រាងច្បាប់មួយ ដែលនឹងអនុញ្ញាតឱ្យប្រើប្រាស់ «គ្រប់មធ្យោបាយការពារចាំបាច់ទាំងអស់» ដើម្បីការពារនាវាដឹកជញ្ជូនពាណិជ្ជកម្ម ដែលជាភាសាការទូតមានន័យថា ការប្រើប្រាស់កម្លាំង។

សេចក្ដីព្រាងនៃសេចក្ដីសម្រេចដែលមើលឃើញដោយសារព័ទ៌មនារ៉យទ័រនោះ បានអនុញ្ញាតឱ្យអនុវត្តវិធានការនានា «ក្នុងរយៈពេលយ៉ាងតិច ៦ខែ... រហូតទាល់តែក្រុមប្រឹក្សាសន្តិសុខសម្រេចជាថ្មី»។ ទោះជាយ៉ាងណាក៏ដោយ ក្នុងការថ្លែងទៅកាន់ក្រុមប្រឹក្សាសន្តិសុខកាលពីព្រឹកថ្ងៃព្រហស្បតិ៍ (២ មេសា) លោក ហ៊្វូ ខុង (Fu Cong) ប្រេសិតអង្គការសហប្រជាជាតិរបស់ចិន បានជំទាស់ដាច់ខាតចំពោះការអនុញ្ញាតឱ្យប្រើប្រាស់កម្លាំងណាមួយ៕