នាយករដ្ឋមន្ត្រីប្រទេសលីបង់ លោក Nawaf Salam បាននិយាយកាលពីថ្ងៃព្រហស្បតិ៍ ទី២ ខែមេសា ថា គ្មានសញ្ញាបញ្ចប់ចំពោះសង្គ្រាមដែលបានបណ្តាលឲ្យមនុស្សជាងមួយលាននាក់ត្រូវជម្លៀសខ្លួនចេញពីលំនៅឋានក្នុងរយៈពេលមួយខែកន្លងទៅនេះ ខណៈគ្រួសារជាច្រើនដែលភៀសខ្លួនចេញពីការវាយប្រហាររបស់អ៊ីស្រាអែល បាននិយាយថា ពួកគេអស់កម្លាំងដោយសារតែជម្លោះម្តងហើយម្តងទៀត។

លីបង់ កំពុងឈានចូលដល់ខែទីពីរនៃជម្លោះរវាងអ៊ីស្រាអែល និងក្រុមប្រដាប់អាវុធហេសបូឡាគាំទ្រដោយអ៊ីរ៉ង់ ដែលបានសន្យាថានឹងកាន់កាប់ផ្នែកមួយចំនួននៅភាគខាងត្បូងប្រទេសលីបង់ ជាផ្នែកនៃ «តំបន់សន្តិសុខ» ដើម្បីការពារប្រជាជននៅភាគខាងជើងរបស់ខ្លួន។ លោក Salam បានប្រាប់អ្នកសារព័ត៌មានកាលពីថ្ងៃព្រហស្បតិ៍ បន្ទាប់ពីកិច្ចប្រជុំគណៈរដ្ឋមន្ត្រីរបស់លោកថា «លីបង់ បានក្លាយជាជនរងគ្រោះនៃសង្គ្រាមដែលលទ្ធផលនិងកាលបរិច្ឆេទនៃការបញ្ចប់សង្គ្រាមគ្មាននរណាម្នាក់អាចទស្សន៍ទាយបានឡើយ»។

លោក Salam និយាយថា «ជំហររបស់មន្ត្រីអ៊ីស្រាអែល និងការអនុវត្តរបស់កងទ័ព បង្ហាញពីគោលដៅដ៏វែងឆ្ងាយ រួមទាំងការពង្រីកដ៏សំខាន់ក្នុងការចូលកាន់កាប់ទឹកដីរបស់ប្រទេសលីបង់ ការពិភាក្សាដ៏គ្រោះថ្នាក់អំពីការបង្កើតតំបន់ទ្រនាប់ ឬខ្សែក្រវ៉ាត់សន្តិសុខ និងការជម្លៀសប្រជាជនលីបង់ជាងមួយលាននាក់»។ ការអះអាងរបស់អ៊ីស្រាអែលថា យោធារបស់ខ្លួននឹងរក្សាការគ្រប់គ្រងនៅភាគខាងត្បូងប្រទេសលីបង់បានជំរុញឱ្យមានការព្រួយបារម្ភនៃការចូលកាន់កាប់រយៈពេលយូរ បន្ទាប់ពីវត្តមានរបស់អ៊ីស្រាអែលរយៈពេលពីរទសវត្សរ៍បានបញ្ចប់នៅឆ្នាំ ២.០០០។ លោក Salam និយាយថា រដ្ឋាភិបាលរបស់លោកនឹងបង្កើនកិច្ចខិតខំប្រឹងប្រែងផ្នែកការទូត និងនយោបាយទ្វេដង ដើម្បីបញ្ចប់សង្គ្រាម។ ការអំពាវនាវរបស់ប្រធានាធិបតីលីបង់ លោក Joseph Aoun សម្រាប់ការចរចាដោយផ្ទាល់ជាមួយអ៊ីស្រាអែល រហូតមកដល់ពេលនេះ ពុំទាន់ទទួលបានការឆ្លើយតបនៅឡើយ។