ទិន្នន័យថ្មីបង្ហាញថា រុស្ស៊ីបានបើកការវាយប្រហារដោយយានដ្រូនក្នុងខែមីនាថ្មីៗនេះលើអ៊ុយក្រែនក្នុងចំនួនច្រើនជាងខែណាៗទាំងអស់ចាប់តាំងពីការវាយលុកទ្រង់ទ្រាយធំឆ្នាំ២០២២ខណៈវិមានក្រឹមឡាំងបានទាត់ចោលសំណើរបស់ទីក្រុងគីវសម្រាប់បទឈប់បាញ់ថ្ងៃបុណ្យ Easter នៅថ្ងៃទី១២ ខែមេសាខាងមុខ។

យោងតាមទិន្នន័យពីកងទ័ពអាកាសអ៊ុយក្រែនដែលដកស្រង់ដោយទីភ្នាក់ងារសារព័ត៌មាន AFP         ទីក្រុងមូស្គូបានបាញ់យានដ្រូនចម្ងាយឆ្ងាយយ៉ាងហោចណាស់៦.៤៦២គ្រឿងចូលទៅក្នុងប្រទេសអ៊ុយក្រែនកាលពីខែមុន កើនឡើង ២៨% បើប្រៀបធៀបទៅនឹងខែកុម្ភៈ។ 

នៅថ្ងៃទី ២៤ ខែមីនាតែមួយ រុស្ស៊ីបានបាញ់យានដ្រូនជាង ១.០០០ គ្រឿងក្នុងរយៈពេល ២៤ ម៉ោង ដែលជាការបាញ់ប្រហារដោយដ្រូនដ៏ធំបំផុតមួយក្នុងរយៈពេលតែមួយថ្ងៃចាប់តាំងពីការចាប់ផ្តើមសង្គ្រាម ដោយបានបណ្ដាលឲ្យមនុស្សមួយចំនួនស្លាប់ និងរាប់សិបនាក់ទៀតរងរបួស។ 

យ៉ាងណាក៏ដោយ ទោះបីជាមានការកើនឡើងនៃការវាយប្រហារដោយយានដ្រូន ក្ដី ចំនួនមីស៊ីលដែលបាញ់ដោយរុស្ស៊ីទៅលើអ៊ុយក្រែនបានធ្លាក់ចុះជិត ៥២% ក្នុងមួយខែ ធ្លាក់ចុះពី ២៨៨ គ្រាប់ក្នុងខែកុម្ភៈ មកត្រឹម ១៣៨ គ្រាប់ក្នុងខែមីនា។

ក្រុមហ៊ុនថាមពលរដ្ឋ Naftogaz របស់អ៊ុយក្រែនក៏បាននិយាយកាលពីថ្ងៃព្រហស្បតិ៍២មេសាសប្ដាហ៍នេះផងដែរថា ទីក្រុងមូស្គូបានបើកការវាយប្រហារចំនួន១២៩ លើកលើហេដ្ឋារចនាសម្ព័ន្ធឧស្ម័ន និងកម្ដៅរបស់អ៊ុយក្រែនអំឡុងពេលរដូវត្រជាក់រយៈពេល១៥១ថ្ងៃថ្មីៗនេះ។

ក្រុមហ៊ុននេះបាននិយាយក្នុងសេចក្តីថ្លែងការណ៍មួយថា រុស្ស៊ីបានវាយប្រហារបំពង់បង្ហូរឧស្ម័ន រោងចក្រផលិតឧស្ម័ន ទីតាំងស្តុកក្រោមដី ប្រព័ន្ធកម្ដៅ  អ្វីគ្រប់យ៉ាងដែលជនជាតិអ៊ុយក្រែនពឹងផ្អែកលើសម្រាប់កម្ដៅ និងឧស្ម័ន។ អ្វីៗទាំងនេះបានកើតឡើងខណៈការចរចាសន្តិភាពសម្របសម្រួលដោយអាមេរិក រវាងរុស្ស៊ី-អ៊ុយក្រែន បានជាប់គាំងស្របពេលទីក្រុងវ៉ាស៊ីនតោនងាកទៅផ្ដោតលើជម្លោះក្នុងប្រទេសអ៊ីរ៉ង់៕