ប្រធានាធិបតីអាមេរិក លោក Donald Trump គ្រោងបើកបង្ហាញសំណើកញ្ចប់ថវិកាការពារជាតិដ៏មានមហិច្ឆតារបស់លោកចំនួន ១,៥ សែនកោដិដុល្លារ សម្រាប់ឆ្នាំថវិកាបន្ទាប់នៅថ្ងៃសុក្រ ទី៣ ខែមេសា នេះ ដែលជាកំណើនដ៏ធំបំផុតមិនធ្លាប់មាននៃការចំណាយលើវិស័យការពារជាតិធៀបនឹងឆ្នាំមុន ចាប់តាំងពីសម័យក្រោយសង្គ្រាមលោកលើកទី២មក។

ការផ្តល់មូលនិធិសម្រាប់ខែលការពារមីស៊ីលឈ្មោះ «Golden Dome» តម្លៃ ១៨៥ ពាន់លានដុល្លាររបស់លោក Trump ត្រូវបានរំពឹងថានឹងដាក់បញ្ចូលជាអាទិភាពទៅក្នុងសំណើថវិកា រួមជាមួយនឹងយន្តហោះចម្បាំង F-35 និងនាវាចម្បាំងជាច្រើនគ្រឿងទៀត។ ការបញ្ជាទិញនាវាមុជទឹកខ្នាត Virginia រួមទាំងអាទិភាពសំខាន់ៗផ្សេងទៀតក្នុងការសាងសង់នាវា ក៏ត្រូវបានរំពឹងទុកផងដែរ។

កាលពីឆ្នាំមុន លោក Trump បានស្នើកញ្ចប់ថវិកាការពារជាតិចំនួន ៨៩២,៦ ពាន់លានដុល្លារពីសភា បន្ទាប់មកបានបន្ថែមចំនួន ១៥០ ពាន់លានដុល្លារទៀត តាមរយៈសំណើថវិកាបន្ថែម ដែលធ្វើឱ្យតម្លៃសរុបកើនឡើងលើសពី ១ សែនកោដិដុល្លារ ជាលើកដំបូងក្នុងប្រវត្តិសាស្ត្រអាមេរិក។ ក្របខណ្ឌសំណើថវិកាថ្មីសម្រាប់ឆ្នាំសារពើពន្ធដែលនឹងបញ្ចប់នៅថ្ងៃទី៣០ ខែកញ្ញា ឆ្នាំ២០២៧ នឹងត្រូវប្រកាសនៅថ្ងៃសុក្រនេះ ហើយមន្ត្រីមន្ទីរបញ្ចកោណមួយរូបបានឱ្យដឹងថា ព័ត៌មានលម្អិតបន្ថែមអំពីកញ្ចប់ថវិកាការពារជាតិដ៏ធំសម្បើមមួយនេះ នឹងត្រូវប្រកាសនៅថ្ងៃទី២១ ខែមេសា ខាងមុខ។

កាលពីដើមឆ្នាំ២០២៦នេះ រដ្ឋបាលរបស់លោក Trump បានពិចារណាថា តើសំណើថវិកាចំនួន ១,៥ សែនកោដិដុល្លារនេះ គួរតែរៀបចំឡើងក្នុងទម្រង់ញែកពីគ្នាជាថវិកាសន្តិសុខជាតិចំនួន ៩០០ ពាន់លានដុល្លារ និងបន្ថែមសំណើបន្ថែមពី ៤០០ ពាន់លានដុល្លារ ទៅ ៦០០ ពាន់លានដុល្លារទៀតដែរឬទេ ដែលស្រដៀងទៅនឹងរចនាបថដែលប្រើក្នុងឆ្នាំ២០២៦។ យ៉ាងណាក៏ដោយ សំណើថវិកានេះនឹងត្រូវយកទៅជជែកដេញដោលក្នុងសភានាពេលប៉ុន្មានសប្តាហ៍ និងប៉ុន្មានខែខាងមុខនេះ៕