សកម្មជនគុយបា បាននាំគ្នាដង្ហែក្បួនតវ៉ាកាលពីថ្ងៃព្រហស្បតិ៍ (២ មេសា) ដោយជិះកង់ និងកង់បីអគ្គិសនីតាមបណ្តោយមហាវិថីមាត់ទឹក Malecon នៃទីក្រុងឡាហាវ៉ាន អមដោយវត្តមានរបស់ប្រធានាធិបតីគុយបា លោក Miguel Diaz-Canel ដើម្បីបង្ហាញការប្រឆាំងរបស់គុយបា ស្របពេលកិច្ចខិតខំប្រឹងប្រែងរបស់សហរដ្ឋអាមេរិក ក្នុងការកាត់ផ្ដាច់លំហូរប្រេងឥន្ធនៈមិនឱ្យទៅដល់ប្រទេសកោះមួយនេះ។

អ្នកចូលរួមក្នុងក្បួនបាតុកម្មដែលរៀបចំដោយរដ្ឋាភិបាល បានជិះកាត់ស្ថានទូតសហរដ្ឋអាមេរិកនៅរដ្ឋធានីគុយបា ដោយមានរថយន្តអគ្គិសនី និងយានអគ្គិសនីផ្សេងទៀត ហើយបានលើកទង់ជាតិ និងបដាសរសេរពាក្យវាយប្រហារទណ្ឌកម្មដែលដាក់លើប្រទេសនេះ ដោយរដ្ឋបាលប្រធានាធិបតីអាមេរិក Donald Trump។

ការប្រមូលផ្ដុំនេះកើតឡើងរយៈពេលមួយថ្ងៃប៉ុណ្ណោះបន្ទាប់ពីអ្នកការទូតជាន់ខ្ពស់របស់គុយបា ប្រចាំនៅទីក្រុងវ៉ាស៊ីនតោន បានអញ្ជើញជាសាធារណៈឱ្យរដ្ឋាភិបាលអាមេរិក ជួយជួសជុលសេដ្ឋកិច្ចដ៏ទ្រុឌទ្រោមរបស់គុយបា ជាផ្នែកមួយនៃកិច្ចចរចាដែលកំពុងដំណើរការប៉ុន្តែមិនទាន់ទទួលបានផ្លែផ្កានៅឡើយ រវាងភាគីទាំងពីរ។ អ្នកចូលរួមក្នុងបាតុកម្មបាននិយាយថា ពួកគេចង់បានការចរចាជាមួយសហរដ្ឋអាមេរិក ប៉ុន្តែក៏ទាមទារឱ្យមានការគោរពចំពោះគុយបាដែរ។

លោកប្រធានាធិបតីគុយបា Diaz-Canel មិនបានថ្លែងសុន្ទរកថាក្នុងព្រឹត្តិការណ៍នេះទេ។ គួរឱ្យដឹងថា រដ្ឋាភិបាលគុយបាតែងតែរៀបចំការប្រមូលផ្ដុំធំៗនៅស្ថានទូតអាមេរិក។ ក្បួនតវ៉ានេះមានទំហំតូចជាង និងមានលក្ខណៈមិនសូវអ៊ូរអរដូចកាលពីមុននោះទេ ដោយសារកង្វះខាតប្រេងឥន្ធនៈដែលបានធ្វើឱ្យប៉ះពាល់ដល់ការធ្វើដំណើរ និងការដឹកជញ្ជូនសាធារណៈ៕