លោក Antonio Guterres អគ្គលេខាធិការអង្គការសហប្រជាជាតិ (UN) កាលពីថ្ងៃព្រហស្បតិ៍ បានបញ្ជាក់សារជាថ្មីនូវការអំពាវនាវរបស់លោកសម្រាប់សហរដ្ឋអាមេរិក និងអ៊ីស្រាអែល ឲ្យបញ្ឈប់សង្គ្រាមប្រឆាំងអ៊ីរ៉ង់ និងសម្រាប់អ៊ីរ៉ង់ឲ្យបញ្ឈប់ការវាយប្រហារប្រទេសជិតខាងខ្លួន។

ដោយបានលើកឡើងថាផលប៉ះពាល់នៃជម្លោះកំពុងត្រូវបានគេគិតថាមាននៅគ្រប់ទីកន្លែង ដោយលោក Guterres បានព្រមានថា ពិភពលោកកំពុងស្ថិតនៅលើមាត់ជ្រោះនៃសង្គ្រាមរាលដាល ដែលនឹងហ៊ុមព័ទ្ធនៅតំបន់មជ្ឈិមបូព៌ាទាំងមូល ដោយមានផលប៉ះពាល់យ៉ាងខ្លាំងនៅជុំវិញពិភពលោក។ លោកអគ្គលេខាធិការ បាននិយាយថា «វិបត្តិនៅមជ្ឈិមបូព៌ា បានរំកិលចូលដល់ខែទីពីរ» និងបានព្រមានថា ទំហំនៃការបំផ្លិចបំផ្លាញ ការវាយប្រហារដោយមិនរើសអើង និងការកំណត់គោលដៅលើជនស៊ីវិល និងហេដ្ឋារចនាសម្ព័ន្ធជនស៊ីវិល កំពុងកើនឡើង។ «សាររបស់ខ្ញុំគឺច្បាស់លាស់ ចំពោះសហរដ្ឋអាមេរិកនិងអ៊ីស្រាអែល វាដល់ពេលហើយដើម្បីបញ្ឈប់សង្គ្រាមដែលកំពុងបង្កទុក្ខវេទនាយ៉ាងធំធេងដល់មនុស្សជាតិ និងបានបង្កផលវិបាកដល់សេដ្ឋកិច្ចធ្ងន់ធ្ងររួចទៅហើយ។ ចំពោះអ៊ីរ៉ង់ ត្រូវបញ្ឈប់ការវាយប្រហារប្រទេសជិតខាងខ្លួន។ ក្រុមប្រឹក្សាសន្តិសុខបានថ្កោលទោសការវាយប្រហារទាំងនេះ និងបានបញ្ជាក់ជាថ្មីអំពីតម្រូវការក្នុងការគោរពសិទ្ធិ និងសេរីភាពនៃការធ្វើនាវាចរណ៍តាមផ្លូវសមុទ្រសំខាន់ៗ រួមទាំងច្រកសមុទ្រ Hormuz ។

ទន្ទឹមនឹងនេះ អ្នកនាំពាក្យអង្គការសហប្រជាជាតិ លោក Stephane Dujarric បាននិយាយថា មនុស្សជាង១,១លាននាក់ត្រូវបានបង្ខំឱ្យចាកចេញពីលំនៅឋានរបស់ខ្លួន ជួនកាលច្រើនជាងម្តង ខណៈបទជម្លៀសរបស់អ៊ីស្រាអែលបានពង្រីកទៅកាន់តំបន់ថ្មីៗ ដោយលោកបាននិយាយថា ជិត១៥% នៃទឹកដីប្រទេសលីបង់ បានប៉ះពាល់ដោយបទបញ្ជាក្នុងខែកន្លងទៅ។ លោក Dujarric បានជំរុញឲ្យមានការការពារជនស៊ីវិល មណ្ឌលថែទាំសុខភាព និងបុគ្គលិកមនុស្សធម៌ ព្រមទាំងដំណើរការចូលពេញលេញសម្រាប់ជំនួយ និងគ្មានការរារាំង ជាពិសេសទៅកាន់ភាគខាងត្បូងប្រទេសលីបង់។ លោកក៏បានអំពាវនាវឲ្យមានមូលនិធិអន្តរជាតិជាបន្ទាន់ដើម្បីបំពេញតម្រូវការដែលកំពុងកើនឡើងយ៉ាងឆាប់រហ័ស។