សម្តេចមហាបវរ​ធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នឹង​អញ្ជើញ​ទៅ​ប្រទេស​បារាំង​ចំនួន ៤ថ្ងៃគឺចាប់ពីថ្ងៃទី៦ ដល់ថ្ងៃទី៩ ខែមេសា ឆ្នាំ២០២៦នេះ ដើម្បី​ចូល​រួម​កិច្ច​ប្រជុំ​កំពូល​ស្តីពី«សុខភាពតែមួយ» ហើយក្រៅពីចូលរួមកិច្ចប្រជុំខាងលើនេះ សម្តេចធិបតី​ក៏​នឹង​មាន​ជំនួប​ទ្វេភាគីជាមួយឥស្សរជនជាន់ខ្ពស់បារាំង និងថ្នាក់ ដឹកនាំប្រទេសផ្សេង​ៗ​ទៀត​មួយ​ចំនួន​ទៀត ក្នុងគោលបំណងពង្រឹងកិច្ចសហប្រតិបត្តិការលើវិស័យនានាផងដែរ។

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ នាព្រឹក ថ្ងៃ​ទី៣ ខែមេសា ឆ្នាំ២០២៦នេះ បានឲ្យដឹងថា តបតាមការអញ្ជើញរបស់ឯកឧត្តម អេម៉ានុយ​អែល ​ម៉ាក្រុង ប្រធានាធិបតីបារាំងនោះ សម្តេចធិបតី នាយករដ្ឋមន្រ្តីនៃព្រះរាជាណាចក្រកម្ពុជា នឹង​ដឹក​នាំគណៈ ប្រតិភូជាន់ខ្ពស់ចូលរួមកិច្ចប្រជុំកំពូលស្តីពី«សុខភាពតែមួយ» និង​ទស្សន​កិច្ច​ការ​ងារ​ដែល​នឹង​ប្រព្រឹត្តទៅ ចាប់ពីថ្ងៃទី៦ដល់ថ្ងៃទី៩ ខែមេសា ឆ្នាំ២០២៦ នៅក្រុងលីយ៉ុង និង​រដ្ឋធា​នី​ប៉ារីស​ ប្រទេសបារាំង។

បើតាមសេចក្តីប្រកាសរបស់ក្រសួងការបរទេស បានបញ្ជាក់ថា កិច្ច​ប្រជុំ​កំពូល​ស្តីពី​«សុខ​ភាព​តែ​មួយ​» ដែលជាកិច្ចប្រជុំកំពូលលើកទី៩នៃកិច្ចប្រជុំកំពូលស្តីពីភពផែនដីតែមួយ គឺជា​ព្រឹត្តិកា​រណ៍​សំខាន់ ​មួយរបស់បារាំង ក្នុងនាមជាប្រធានក្រុមប្រទេសG7 នៅឆ្នាំ២០២៦។ កិច្ចប្រជុំ​កំពូល​នេះ​គឺ​ជា​វេទិកាកម្រិត ខ្ពស់សម្រាប់ការជួបជុំប្រមុខរដ្ឋ និងរដ្ឋាភិបាលតំណាងអង្គការអន្តរជាតិ សង្គម​ស៊ីវិល​ អ្នកវិទ្យាសាស្រ្ត និង ធានាគារអភិវឌ្ឍន៍ពហុភាគីនានា ដើម្បីពិភាក្សា​បញ្ហាពា​ក់​ព័ន្ធ​នឹង​សុខ​ភាព​មនុស្ស សត្វ និងប្រព័ន្ធអេកូឡូស៊ីជាដើម។

តាមការគ្រោងទុកក្នុងអំឡុងពេលស្នាក់ប្រទេសបារាំងនោះ សម្តេចធិបតី នាយករដ្ឋមន្រ្តីក៏នឹងជួប ជា​មួយឥស្សរជនជាន់ខ្ពស់បារាំង និងថ្នាក់ដឹកនាំប្រទេសផ្សេងៗទៀតមួយចំនួន ដើម្បី​ផ្លាស់​ប្តូរ​យោបល់​គ្នា លើការពង្រឹងទំនាក់ទំនងទ្វេភាគី និងពង្រឹងកិច្ចស​ហ​ប្រតិបត្តិ​ការ​លើ​វិស័យ​នានា​ផង​ដែរ​៕