ក្រសួងពាណិជ្ជកម្ម រួមជាមួយក្រសួងកិច្ចការនារី នៅថ្ងៃទី២ ខែមសាកន្លងទៅ បានសម្ពោធយុទ្ធនាការ «ផលិតផលស្រ្តី #MadeByHer» បំណងចង់លើកកម្ពស់ផលិតផលជាតិ ជាពិសេស ផលិតផលបង្កើតឡើងដោយស្រ្តី។

យោងតាមផេកផ្លូវការរបស់ក្រសួងពាណិជ្ជកម្ម បានឱ្យដឹងថា ពិធីនេះប្រព្រឹត្តទៅក្រោមវត្តមានរបស់ លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម និង លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី និងមានការចូលរួមពី ថ្នាក់ដឹកនាំ និងមន្រ្តីរាជការព្រមទាំងតំណាងសិប្បកម្ម និងសហគ្រាសផលិតក្នុងស្រុក ជាច្រើនរូប។

លោកជំទាវរដ្ឋមន្រ្តីក្រួងពាណិជ្ជកម្ម បានមានប្រសាសន៍ឱ្យដឹងថា យុទ្ធនាការ «ផលិតផលស្រ្តី #MadeByHer» ធ្វើឡើងក្នុងបំណងលើកកម្ពស់ និងគាំទ្រផលិតផលដែលដឹកនាំដោយសហគ្រិនស្ត្រីខ្មែរ ឱ្យអាចអភិវឌ្ឍពីអាជីវកម្មខ្នាតតូច ឆ្ពោះទៅជាម៉ាកផលិតផលជាតិ ដែលមានគុណភាព ស្តង់ដារ និងសមត្ថភាពប្រកួតប្រជែងក្នុងទីផ្សារ ព្រមទាំងជំរុញការកែលម្អគុណភាពផលិតផល និងការវេចខ្ចប់ឱ្យស្របតាមស្តង់ដារប្រើប្រាស់ និងតម្រូវការទីផ្សារ ពង្រីកឱកាសចូលដំណើរការទីផ្សារថ្មីៗ និងលើកកម្ពស់ការផ្សព្វផ្សាយឱ្យប្រជាពលរដ្ឋចូលរួមគាំទ្រផលិតផលក្នុងស្រុក ដែលផលិតដោយស្ត្រីខ្មែរ ជាពិសេសដើម្បីនាំយកផលិតផលដែលដឹកនាំដោយស្ត្រីឱ្យចូលទៅក្នុងផ្សារទំនើប ពិព័រណ៍ពាណិជ្ជកម្មជាតិនិងអន្តរជាតិ និងវេទិកាពាណិជ្ជកម្មឌីជីថល សំដៅបង្កើនឱកាសទីផ្សារ និងការទទួលស្គាល់ពីសាធារណជនក្នុងស្រុក និងអន្តរជាតិ។

លោកជំទាវរដ្ឋមន្រ្តី បន្ថែមថា យុទ្ធនាការនេះ គឺជាផ្នែកមួយនៃយុទ្ធនាការ “ផលិតផលជាតិ #MadeinCambodia” ដែលក្រសួងបានប្រកាសដាក់ឱ្យដំណើរការកាលពីថ្ងៃទី១៤ ខែកុម្ភៈ ឆ្នាំ២០២៦កន្លងទៅ ដោយផ្តោតសំខាន់លើការលើកកម្ពស់ផលិតផលក្នុងស្រុក។ លើសពីនេះ «ផលិតផលស្ត្រី #MadeByHer» មិនត្រឹមតែសំដៅលើតែផលិតផលមួយមុខប៉ុណ្ណោះទេ ប៉ុន្តែគំនិតផ្តួចផ្តើមនេះបានផ្សារភ្ជាប់នឹង ក្តីសង្ឃឹម កិច្ចខិតខំប្រឹងប្រែង និងសក្តានុពលដ៏អស្ចារ្យរបស់ស្ត្រីកម្ពុជា ផងដែរ។

លោកជំទាវ ចម និម្មល បានវាយតម្លៃខ្ពស់ និងកោតសរសើរ តំណាងសិប្បកម្ម និងសហគ្រាសផលិតក្នុងស្រុក និងក្រុមការងារពាក់ព័ន្ធទាំងអស់ ចំពោះឆន្ទៈរួមគ្នាជាធ្លុងមួយក្នុងការលើកកម្ពស់ផលិតផលក្នុងស្រុក ជាពិសេសផលិតផលស្រី ក្នុងស្មារតីមហាគ្រួសារខ្មែរតែមួយ ព្រមទាំងបានបង្ហាញនូវជំនឿថា យុទ្ធនាការនេះនឹងក្លាយជាមូលដ្ឋានក្នុងការជំរុញការតភ្ជាប់ រវាងក្រុមអ្នកផលិត អ្នកផ្គត់ផ្គង់ ទៅនឹងតួអង្គពាក់ព័ន្ធក្នុងទីផ្សារនិងខ្សែច្រវាក់តម្លៃ សំដៅធានាបាននូវនិរន្តរភាពការផ្គត់ផ្គង់ ការស្រូបទិញនិងការលើកកម្ពស់ផលិតផលក្នុងស្រុក៕ អត្ថបទ៖ ឈិត បូរ៉ាវី