ប្រធានកាកបាទក្រហមនៅប្រទេសអ៊ីរ៉ង់ បាននិយាយថា តម្រូវការវេជ្ជសាស្រ្តបន្ទាន់នៅក្នុងប្រទេសអ៊ីរ៉ង់កំពុងកើនឡើងខ្លាំង ដោយអំពាវនាវឱ្យមានការគាំទ្របន្ថែម និងបានបង្ហាញការព្រួយបារម្ភអំពីសមត្ថភាពរបស់ខ្លួនក្នុងការបំពេញបន្ថែមការផ្គត់ផ្គង់ ប្រសិនបើសង្គ្រាមរយៈពេលជាងមួយខែមកនេះ នៅតែបន្ត។

មនុស្សជាង ១.៩០០នាក់ ត្រូវបានសម្លាប់ចាប់តាំងពីការវាយប្រហារតាមអាកាសរបស់សហរដ្ឋអាមេរិក និងអ៊ីស្រាអែល លើប្រទេសអ៊ីរ៉ង់ បានចាប់ផ្តើមជាងមួយខែកន្លងទៅនេះ និងមនុស្សជាង២១.០០០នាក់បានរងរបួស នេះបើយោងតាមសហព័ន្ធនៃសមាគមកាកបាទក្រហមនិងអឌ្ឍចន្ទក្រហមអន្តរជាតិ (IFRC) ជាអង្គការមនុស្សធម៌នៅក្នុងប្រទេសតែមួយគត់ដែលកំពុងធ្វើប្រតិបត្តិការនៅទីនោះ។

លោកស្រី Maria Martinez ប្រធានគណៈប្រតិភូប្រចាំប្រទេសអ៊ីរ៉ង់ បាននិយាយនៅក្នុងបទសម្ភាសន៍តាមវីដេអូ ពីទីក្រុងតេអេរ៉ង់ថា «ស្ថានភាពមនុស្សធម៌ នៅក្នុងប្រទេសនេះកាន់តែធ្ងន់ធ្ងរជារៀងរាល់ថ្ងៃ»។ ក្រុមជំនួយនេះ មានអ្នកឆ្លើយតបចំនួន១សែននាក់នៅទូទាំងខេត្តចំនួន៣១ របស់ប្រទេស ព្រមទាំងមានរោងចក្រ ឧទ្ធម្ភាគចក្រ និងសត្វសុនខជួយសង្គ្រោះរបស់ខ្លួន ដែលផ្តល់ជំនួយដំបូងសម្រាប់អ្នករងរបួសដោយការវាយប្រហារតាមអាកាស និងគាំទ្រដល់អ្នកជម្លៀសខ្លួន។ លោកស្រី និយាយថា សម្រាប់ពេលនេះ ខ្លួនមិនប្រឈមនឹងកង្វះការផ្គត់ផ្គង់ទេ ប៉ុន្តែខ្វះការផ្តល់មូលនិធិ ហើយកំពុងប្រឈមនឹងការពន្យារពេល និងការកើនឡើងតម្លៃសម្រាប់ការនាំចូល។ លោកស្រី និយាយថា សហព័ន្ធនៃសមាគមកាកបាទក្រហមនិងអឌ្ឍចន្ទក្រហមអន្តរជាតិ(IFRC)  អាចត្រូវពិនិត្យឡើងវិញការអំពាវនាវបន្ទាន់រកថវិកាចំនួន៥០,០៥លានដុល្លាររបស់ខ្លួន ទោះបីជាបច្ចុប្បន្នខ្លួនទទួលបានមូលនិធិត្រឹមតែ ៦% ក៏ដោយ។ សហព័ន្ធនៃសមាគមកាកបាទក្រហមនិងអឌ្ឍចន្ទក្រហមអន្តរជាតិ(IFRC)  មិនអាចនាំចូលឧបករណ៍សម្រាប់របួសដែលគំរាមកំហែងដល់អាយុជីវិត ពីឃ្លាំងនៅទីក្រុងឌូបៃរយៈពេលជាច្រើនសប្តាហ៍មកហើយ ក្នុងចំណោមបញ្ហាដឹកជញ្ជូនដែលជាប់ទាក់ទងនឹងជម្លោះ ខណៈអ៊ីរ៉ង់បានបិទច្រកសមុទ្រ Hormuz ដើម្បីសងសឹកចំពោះការវាយប្រហាររបស់សហរដ្ឋអាមេរិក-អ៊ីស្រាអែល។