វិមានខៀវ ដែលជាវិមានប្រធានាធីបតីកូរ៉េខាងត្បូង បានបញ្ជាក់នៅក្នុងសេចក្តីថ្លែងការណ៍មួយនាថ្ងៃសុក្រ (៣ មេសា) នេះថា ប្រធានាធិបតីកូរ៉េខាងត្បូង លោក Lee Jae Myung និងសមភាគីបារាំង លោក Emmanuel Macron ត្រៀមនឹងដំឡើងកម្រិតទំនាក់ទំនងរវាងប្រទេសទាំងពីរទៅជា «ភាពជាដៃគូយុទ្ធសាស្ត្រសកល» នៅក្នុងជំនួបកំពូលដ៏សំខាន់។

លោក Macron បានទៅដល់កូរ៉េខាងត្បូង កាលពីថ្ងៃព្រហស្បតិ៍ សម្រាប់ទស្សនកិច្ចផ្លូវរដ្ឋរយៈពេល ២ថ្ងៃ បន្ទាប់ពីបានទៅបំពេញទស្សនកិច្ចនៅជប៉ុន ហើយលោកគ្រោងចូលរួមកិច្ចប្រជុំកំពូលជាមួយលោក Lee ក្នុងទីក្រុងសេអ៊ូល នៅថ្ងៃសុក្រនេះ។ នេះគឺជាដំណើរទស្សនកិច្ចផ្លូវរដ្ឋលើកដំបូងរបស់ប្រធានាធិបតីបារាំង គិតចាប់តាំងពីឆ្នាំ២០១៥មក ខណៈមន្ត្រីបារាំងបានលើកឡើងថា ទស្សនកិច្ចនេះមានគោលបំណងពង្រឹងតួនាទីសេដ្ឋកិច្ច និងយុទ្ធសាស្ត្ររបស់បារាំងនៅក្នុងតំបន់ ស្របពេល «ភាពតានតឹងអន្តរជាតិ និងតំបន់យ៉ាងខ្លាំងក្លា»។

ក្រុមមន្ត្រីបារាំងធ្លាប់និយាយថា វិបត្តិនៅមជ្ឈិមបូព៌ានឹងក្លាយជា «ចំណុចស្នូលនៃកិច្ចពិភាក្សា» ដោយផ្ដោតលើផលប៉ះពាល់សេដ្ឋកិច្ចរួមគ្នា ដែលប្រទេសទាំងពីរត្រូវប្រឈម។ ដូចទៅនឹងបណ្តាសេដ្ឋកិច្ចអាស៊ីផ្សេងទៀតដែរ កូរ៉េខាងត្បូងពឹងផ្អែកខ្លាំងលើការនាំចូលថាមពល រួមទាំងការដឹកជញ្ជូនតាមច្រកសមុទ្រហ័រមូស ដែលការបិទច្រកនេះបានធ្វើឱ្យតម្លៃថាមពលហក់ឡើងខ្ពស់ និងអង្រួនសេដ្ឋកិច្ចសកល។

យោងតាមវិមានប្រធានាធិបតីបារាំង Elysee បានឱ្យដឹងថា ទីក្រុងប៉ារីស កំពុងស្វះស្វែងរកការគាំទ្រពីទីក្រុងសេអ៊ូល សម្រាប់គំនិតផ្ដួចផ្ដើមសន្តិសុខផ្លូវទឹកដែលដឹកនាំដោយបារាំង នៅក្នុងច្រកសមុទ្រហ័រមូស មិនថាជាទម្រង់ពហុភាគី ឬទ្វេភាគីនោះទេ។ លោក Macron បាននិយាយកាលពីថ្ងៃព្រហស្បតិ៍ បន្ទាប់ពីទៅដល់ទីក្រុងសេអ៊ូលថា ការចាប់ផ្តើមប្រតិបត្តិការយោធា ដើម្បីបង្ខំឱ្យបើកច្រកសមុទ្រហ័រមូសឡើងវិញជារឿងមិនប្រាកដនិយមនោះទេ៕