សៀមរាប ៖ ក្រោមការចង្អុលបង្ហាញ និងយកចិត្តទុកដាក់លើសុខទុក្ខ និងសុខភាពប្រជាពលរដ្ឋទូទៅរបស់ឯកឧត្តម ឧត្តមសេនីយ៍ឯក វេជ្ជបណ្ឌិត លី សុវណ្ណ នាយកមនី្ទរពេទ្យព្រះកេតុមាលា និងជាអនុប្រធានគណៈពង្រឹងថ្នាក់ជាតិចុះមូលដ្ឋានឃុំកន្ទ្រាំង ក្រុមគ្រូពេទ្យមួយក្រុមនៃមនី្ទរពេទ្យព្រះកេតុមាលា បានចុះពិនិត្យ ព្យបាលជំងឺជូនប្រជាពលរដ្ឋ ឃុំកន្រ្ទាំង ស្រុកប្រាសាទបាគង ខេត្តសៀមរាប នៅបរិវេណទីស្នាក់ការគណបក្សប្រជាជនកម្ពុជា ឃុំកន្ទ្រាំង នាថ្ងៃទី0១ ខែមេសា ឆ្នាំ២០២២នេះ។

ឆ្លៀតក្នុងឱកាសដែរលោកបណ្ឌិត អ៊ី លីម៉ា តំណាងឯកឧត្តម ឧត្តមសេនីយ៍ឯក វេជ្ជបណ្ឌិត លី សុវណ្ណ នាយកមនី្ទរពេទ្យព្រះកេតុមាលា និងជាអនុប្រធានគណៈពង្រឹងថ្នាក់ជាតិចុះមូលដ្ឋានឃុំកន្ទ្រាំង បានដឹកនាំក្រុមការងារគ្រូពេទ្យ ចុះពិនិត្យ ព្យាបាលជំងឺ និងចែកអំណោយថ្នាំពេទ្យដោយឥតគិតថ្លៃ ដែលជាអំណោយដ៏ថ្លៃថ្លារបស់ឯកឧត្តម ឧត្តមសេនីយ៍ឯកវេជ្ជបណ្ឌិត លី សុវណ្ណ ជូនប្រជាពលរដ្ឋឃុំកន្ទ្រាំង បានមានប្រសាសន៍ថា ថ្ងៃនេះក្រុមគ្រូពេទ្យនៃមនី្ទរពេទ្យព្រះកេតុមាលា ពិតជាមានកី្តសប្បាយរីករាយជាទីបំផុត ដែលបានចុះមកផ្តល់សេវាសុខាភិបាល ជូនប្រជាពលរដ្ឋនៅទូទាំងឃុំផ្ទាល់។ ដូច្នេះនាឱកាសដែលបងប្អូនប្រជាពលរដ្ឋ បានអញ្ជើញមកទទួលសេវាសុខាភិបាលនេះ សូមចូលតាមលេខរៀង និងតាមផ្នែកជំនាញនីមួយៗ តាមក្រុមអ្នកសម្របសម្រួលជូនបងប្អូនប្រជាពលរដ្ឋលោកតា លោកយាយ អ៊ុ ពូ មីង ឲ្យត្រូវតាមមុខជំងឺ ដែលមានដូចជា៖ ផ្នែកពិនិត្យជំងឺទូទៅ ជំងឺកុមារ ភ្នែក ធ្មេញ ច្រមុះ ត្រចៀក បំពង់ក រោគស្រី្ត អេកូសាស្រ្ត ផ្នែកមនី្ទរពិសោធន៍ និងវិភាគឈាម សើរស្បែក សន្លាក់ឆ្អឹង និងវៈកាត់តូច គិតមកដល់ពេលនេះ ពិនិត្យ និងព្យាបាលជំងឺជូនប្រជាពលរដ្ឋ សរុបចំនួន១២៨៦នាក់ និងស្រី៩៩២នាក់។

ទន្ទឹមនឹងនោះលោក ឃាម ឆាង មេឃុំកន្ទ្រាំង និងជាប្រធានគណៈកម្មាធិការគណបក្សឃុំ បានឲ្យដឹងថា ព្រឹកនេះប្រជាពលរដ្ឋដែលមកទទួលសេវាពិនិត្យ ព្យាបាលជំងឺ និងទទួលអំណោយថ្នាំពេទ្យ មកពី៨ភូមិ ដែលទទួលបានការយកចិត្តទុកដាក់ដ៏ខ្ពង់ខ្ពស់ជាទីបំផុត ពីក្រុមការ ងារគ្រូពេទ្យ នៃមនី្ទរពេទ្យព្រះកេតុមាលា ដែលមានឯកឧត្តម ឧត្តមសេនីយ៍ឯកវេជ្ជបណ្ឌិត លី សុវណ្ណ ជានាយក មនី្ទរពេទ្យ ដែលយើងទាំងអស់គ្នា កំពុងស្ថិតក្នុងស្ថានភាពដ៏លំបាក ដែលបង្ករឡើងដោយ វីរុសកូវីដ-១៩។

ជាមួយគ្នានោះដែរវេជ្ជបណ្ឌិតជំនាញទាំង០៣រូប មកពីមនី្ទរពេទ្យព្រះកេតុមាលា គឺវរៈសេនីយ៍ទោ ឈួន បូរិទ្ធ ផ្នែកមាត់ធ្មេញ វេជ្ជបណ្ឌិត អាំ ផេង ផ្នែកអេកូសាស្រ្ត និងវេជ្ជបណ្ឌិត ទេព សោភ័ណ្ឌ ផ្នែកត្រចៀក ច្រមុះ បំពង់ក បានលើកឡើងស្រដៀងគ្នាថា ក្រុមគ្រូពេទ្យរបស់យើងពិតជាសប្បាយចិត្តដែលបានចូលរួមការងារសប្បុរសធម៌ ដែលមានការចង្អុលបង្ហាញផ្ទាល់ពីឯកឧត្តម ឧត្តមសេនីយ៍ឯកវេជ្ជបណ្ឌិត លី សុវណ្ណ ដែលមានបំណងរួមគ្នា ដើម្បីលើកកម្ពស់សុខុមាលភាពជូនប្រជាពលរដ្ឋនៅក្នុងមូលដ្ឋានសហគមន៍ឃុំកន្រ្ទាំង ឲ្យកាន់តែប្រសើរ។

បងប្អូនប្រជាពលរដ្ឋ ក្មេង ចាស់ ប្រុស ស្រី បានមកទទួលសេវាពិនិត្យ ព្យាបាលជំងឺនិងទទួលអំណោយថ្នាំពេទ្យដោយឥតគិតថ្លៃ បានបង្ហាញចំណាប់អារម្មណ៍សប្បាយរីករាយ ដោយទទួលបានការពិនិត្យ ព្យាបាលជំងឺដោយឥតគិតថ្លៃពីក្រុមគ្រូពេទ្យនៃមនី្ទរពេទ្យព្រះកេតុមាលា។

ជាចុងក្រោយលោកបណ្ឌិត អ៊ី លីម៉ា បានសង្កត់ធ្ងន់ថា សុខភាព គឺជាកត្តាចំបង និងត្រូវតែនាំគ្នាថែរក្សាឲ្យបានល្អ ចៀសវាងនូវជំងឺដង្កាត់ផ្សេងៗ ដោយអនុវត្តឲ្យបានខ្ជាប់ខ្ជួននូវអនាម័យ រស់នៅស្អាត ហូបស្អាត បរិស្ថានស្អាត ជាពិសេសត្រូវអនុវត្តន៍វិធានការសុខាភិបាល និងតាមអនុសាសន៍របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណចក្រកម្ពុជា ៣កុំ ៣ការពារ ដើម្បីចូលរួមការពារ ទប់ស្កាត់ការរីករាលដាលមេរោគកូវីដ-១៩។ ជាពិសេសសូមបង  ប្អូនប្រជាពលរដ្ឋ កុំភ្លេច នាខែក្រោយនេះ នឹងមានរៀបចំការបោះឆ្នោតជ្រើសរើស ឃុំ-សង្កាត់។ ដូចនេះ សូមពិនិត្យមើលឈ្មោះ និងលេខរៀងឡើងវិញ នឹងបន្តចូលរួមទាំងអស់គ្នា ព្រោះថាអ្វីក៏ដោយ យើងមានសន្តិភាព ហើយមានសន្តិភាពនេះ ទើបមានក្រុមគ្រូពេទ្យចុះមកជួបជុំសំណេះសំណាល និងពិនិត្យ ព្យាបាលជំងឺជូនបងប្អូនប្រជាពលរដ្ឋដល់មូលដ្ឋានសហគមន៍ផងដែរ៕ អត្ថបទ ៖ រដ្ឋា