សារព័ត៌មាន Financial Times បានរាយការណ៍នៅថ្ងៃសុក្រ (៣ មេសា) នេះថា លោក Dan Jorgensen ស្នងការថាមពលប្លុកអឺរ៉ុប បានចេញការព្រមាននៅក្នុងបទសម្ភាសន៍មួយថា សហភាពអឺរ៉ុបកំពុងវាយតម្លៃ «លទ្ធភាពទាំងអស់» រួមទាំងការកំណត់កម្រិតប្រេងឥន្ធនៈ និងការបញ្ចេញប្រេងបន្ថែមទៀតពីទុនបម្រុងសង្គ្រោះបន្ទាន់ ខណៈដែលខ្លួនកំពុងត្រៀមខ្លួនសម្រាប់វិបត្តិថាមពល «យូរអង្វែង» ពីសង្គ្រាមមជ្ឈិមបូព៌ា។

លោក Jorgensen បានប្រាប់សារព័ត៌មាន FT ថា «វិបត្តិនេះនឹងក្លាយជាវិបត្តិដ៏យូរអង្វែងមួយ... តម្លៃថាមពលនឹងខ្ពស់ជាងនេះក្នុងរយៈពេលយូរទៀតណាស់» ដោយបន្ថែមថា សម្រាប់ផលិតផលថាមពល «សំខាន់ៗ» មួយចំនួន «អឺរ៉ុបរំពឹងថាវានឹងកាន់តែអាក្រក់ទៅៗនៅក្នុងប៉ុន្មានសប្តាហ៍ខាងមុខ»។

កាលពីដើមសប្ដាហ៍នេះ ប្រធានថាមពលរបស់ប្លុកអឺរ៉ុបរូបនេះបានលើកឡើងថា សហភាពអឺរ៉ុប កំពុងពិចារណាលើការយកមកប្រើប្រាស់ឡើងវិញនូវវិធានការវិបត្តិថាមពលដែលខ្លួនបានប្រើក្នុងឆ្នាំ២០២២ នៅពេលដែលរុស្ស៊ី បានកាត់ផ្ដាច់ការផ្គត់ផ្គង់ឧស្ម័នជុំវិញជម្លោះអ៊ុយក្រែន ដើម្បីដោះស្រាយការរំខានដែលកំពុងកើតឡើងចំពោះទីផ្សារថាមពលដែលបណ្តាលមកពីសង្គ្រាមអ៊ីរ៉ង់។

ការពឹងផ្អែកយ៉ាងខ្លាំងរបស់អឺរ៉ុបលើឥន្ធនៈនាំចូល ធ្វើឱ្យប្លុកនេះប្រឈមនឹងផលប៉ះពាល់យ៉ាងខ្លាំងនៃជម្លោះនៅមជ្ឈិមបូព៌ា ទៅលើតម្លៃថាមពលពិភពលោក។ តម្លៃឧស្ម័ននៅអឺរ៉ុប បានហក់ឡើងជាង ៧០% ចាប់តាំងពីសង្គ្រាមអាមេរិក-អ៊ីស្រាអែលជាមួយអ៊ីរ៉ង់ បានចាប់ផ្តើមនៅថ្ងៃទី២៨ ខែកុម្ភៈមក៕