ក្រសួងការពារជាតិរុស្ស៊ី បាននិយាយកាលពីថ្ងៃព្រហស្បតិ៍ (២ មេសា) ថា កងកម្លាំងមីស៊ីលយុទ្ធសាស្ត្ររបស់រុស្ស៊ី បានធ្វើសមយុទ្ធនៅតំបន់ស៊ីបេរី ដែលពាក់ព័ន្ធនឹងចលនាបន្លំភ្នែកដើម្បីការពារក្បាលគ្រាប់នៃមីស៊ីលបាលិស្ទិកអន្តរទ្វីប Yars ដែលមានសមត្ថភាពផ្ទុកក្បាលគ្រាប់នុយក្លេអ៊ែរ។ សមយុទ្ធនេះ កើតឡើងស្របពេលភាពតានតឹងរវាងរុស្ស៊ី និងអង្គការណាតូ នៅតែមានកម្រិតខ្ពស់។

ក្រសួងរុស្ស៊ីបន្តថា កងកម្លាំងបានអនុវត្តសកម្មភាពជាច្រើន រួមទាំងការប្រើប្រាស់បច្ចេកទេសបន្លំភ្នែក និងការលាក់បាំង ដើម្បីបិទបាំងចលនានៃប្រព័ន្ធមីស៊ីលបាញ់ចេញពីដីមួយនេះ នៅក្នុងសមរភូមិ។ ការយកចិត្តទុកដាក់ជាពិសេស ត្រូវបានផ្ដោតលើការការពារប្រព័ន្ធមីស៊ីលចល័ត នៅពេលកំពុងធ្វើដំណើរ និងនៅតាមទីតាំងឈរជើងរបស់យុទ្ធោបករណ៍ទាំងនោះ។ កងកម្លាំងរុស្ស៊ី ក៏បានហាត់សមឆ្លើយតប ដោយនិម្មិតការវាយប្រហាររបស់សត្រូវ និងការទប់ទល់នឹងអាវុធវាយប្រហារតាមអាកាសផងដែរ។ ក្រសួងការពារជាតិរុស្ស៊ី មិនបានរាយការណ៍ពីការបាញ់បង្ហោះមីស៊ីលណាមួយនោះទេ។

រុស្ស៊ី តែងតែរៀបចំសមយុទ្ធកងកម្លាំងនុយក្លេអ៊ែរយុទ្ធសាស្ត្ររបស់ខ្លួនជាទៀងទាត់ ដើម្បីសាកល្បងការត្រៀមខ្លួនប្រយុទ្ធ និងដើម្បីផ្ញើសារព្រមានទៅកាន់លោកខាងលិច ក្នុងអំឡុងពេលដែលមានភាពតានតឹងខ្លាំងជាមួយគូប្រជែងរបស់ខ្លួនគឺសម្ព័ន្ធយោធាណាតូ ជុំវិញសង្រ្គាមនៅអ៊ុយក្រែន។

រុស្ស៊ីបាននិយាយថា ខ្លួននឹងឆ្លើយតបវិញ ប្រសិនបើណាតូ ដាក់ពង្រាយអាវុធនុយក្លេអ៊ែរនៅលើទឹកដីហ្វាំងឡង់ ដោយអះអាងថា ទង្វើបែបនេះនឹងធ្វើឱ្យរុស្ស៊ី «កាន់តែងាយរងគ្រោះ»។ រីឯរដ្ឋាភិបាលហ្វាំងឡង់វិញ បានចាប់ផ្ដើមធ្វើវិសោធនកម្មជាប្រវត្តិសាស្ត្រនៃច្បាប់ថាមពលនុយក្លេអ៊ែរឆ្នាំ១៩៨៧របស់ខ្លួន ដែលរហូតមកដល់ពេលនេះ បានហាមឃាត់យ៉ាងតឹងរ៉ឹងនូវការនាំចូល និងការរក្សាទុកគ្រាប់នុយក្លេអ៊ែរនៅលើទឹកដីរបស់ហ្វាំងឡង់៕