ប្រមុខយោធាមីយ៉ាន់ម៉ា លោក Min Aung Hlaing បានឈ្នះការបោះឆ្នោត នៅសភា ដើម្បីក្លាយជាប្រធានាធិបតី ដោយធ្វើឲ្យការគ្រប់គ្រងអំណាចនយោបាយរបស់លោកក្លាយជាផ្លូវការ នៅក្នុងប្រទេសមួយដែលហែកហួរដោយសង្គ្រាម។

លោកឧត្តមសេនីយ៍វ័យ ៦៩ឆ្នាំរូបនេះ បានធ្វើរដ្ឋប្រហារឆ្នាំ២០២១ ទម្លាក់រដ្ឋបាលរបស់លោកស្រី អ៊ុង សាន ស៊ូជី (Aung San Suu Kyi) ដែលជាម្ចាស់ពានរង្វាន់ណូបែលសន្តិភាព និងបានចាប់ខ្លួនលោកស្រី ដោយបង្កឲ្យមានការតវ៉ាយ៉ាងទូលំទូលាយ ដែលបានប្រែក្លាយទៅជាការតស៊ូប្រដាប់អាវុធទូទាំងប្រទេសប្រឆាំងនឹងរបបយោធា។

ទិដ្ឋភាពផ្លាស់ប្តូរតួនាទីពីឧត្តមសេនីយ៍កំពូល ទៅជាប្រធានាធិបតីស៊ីវិលនេះ បានកើតឡើងបន្ទាប់ពីការបោះឆ្នោតដែលត្រូវបានចោទថា មិនស្មើភាព កាលពីខែធ្នូឆ្នាំមុន និងខែមករាឆ្នាំនេះ ដែលគណបក្សគាំទ្រដោយកងទ័ព ទទួលបានជ័យជម្នះក្នុងសំឡេងដ៏លើសលប់។ រដ្ឋាភិបាលលោកខាងលិច បានចាត់ទុកដំណើរការនេះថា ជាការរៀបចំឈុតឆាក ដើម្បីបន្តការគ្រប់គ្រងយោធានៅពីក្រោយរបាំងប្រជាធិបតេយ្យ។

នៅក្នុងការផ្សាយផ្ទាល់នៃការរាប់សន្លឹកឆ្នោត អតីតមេបញ្ជាការរូបនេះ ទទួលបានសន្លឹកឆ្នោតលើសចំនួនដែលត្រូវការ ដើម្បីក្លាយជាប្រធានាធិបតី។ ការឡើងកាន់តំណែងប្រធានាធិបតីរបស់លោក Min Aung Hlaing ជាតំណែងមួយដែលអ្នកវិភាគលើកឡើងថា លោកបានស្វែងរកជាយូរមកហើយនោះ បានកើតឡើងបន្ទាប់ពីមានការរុះរើដ៏សំខាន់ នៅក្នុងជួរថ្នាក់ដឹកនាំនៃកងកម្លាំងប្រដាប់អាវុធមីយ៉ាន់ម៉ា ដែលលោកបានដឹកនាំតាំងពីឆ្នាំ២០១១។

គួបញ្ជាក់ថា កាលពីថ្ងៃចន្ទដើមសប្ដាហ៍នេះ លោកត្រូវបានតែងតាំងនៅក្នុងសភាជាបេក្ខជនប្រធានាធិបតី និងបានតែងតាំងលោក Ye Win Oo (យ៉េ វីន អូ) អតីតប្រធានចារកម្មដែលត្រូវបានគេមើលឃើញថា មានភាពស្មោះត្រង់យ៉ាងខ្លាំងចំពោះលោកឧត្តមសេនីយ៍ ជាអ្នកស្នងតំណែងរបស់លោក ដើម្បីដឹកនាំយោធា៕