មេដឹកនាំយោធារបស់ប្រទេសនេះ បាននិយាយនៅក្នុងបទសម្ភាសន៍មួយដែលចាក់ផ្សាយតាមទូរទស្សន៍ជាតិកាលពីថ្ងៃព្រហស្បតិ៍ថា ប្រជាជនប៊ួគីណាហ្វាសូ ត្រូវតែ «បំភ្លេច»លទ្ធិប្រជាធិបតេយ្យ។  

លោកអនុសេនីយ៍ឯក Ibrahim Traore បានឡើងកាន់តំណែង ដោយធ្វើរដ្ឋប្រហារខែកញ្ញា ឆ្នាំ ២០២២ បន្ទាប់ពីផ្តួលរំលំរបបយោធាមួយផ្សេងទៀត ហើយបានបំបិទសំឡេងប្រឆាំងទាំងស្រុង ចាប់តាំងពីពេលនោះមក។

រដ្ឋាភិបាលយោធា បានរំលាយគណៈកម្មការរៀបចំការបោះឆ្នោតរបស់ប្រទេសនេះ កាលពីឆ្នាំមុន ហើយបន្ទាប់មកនៅក្នុងខែកុម្ភៈ សភាដឹកនាំដោយរបបយោធា បានរំលាយគណបក្សនយោបាយទាំងអស់ ដែលសកម្មភាពរបស់ពួកគេ ត្រូវបានផ្អាក ចាប់តាំងពីឆ្នាំ ២០២២។

លោក Traore បាននិយាយនៅក្នុងបទសម្ភាសន៍ជាមួយទូរទស្សន៍រដ្ឋ RTB ថា «ជាដំបូង យើងមិននិយាយអំពីការបោះឆ្នោតទេ»។

«ប្រជាជនត្រូវតែភ្លេចអំពីបញ្ហាលទ្ធិប្រជាធិបតេយ្យ។ លទ្ធិប្រជាធិបតេយ្យ មិនមែនសម្រាប់យើងទេ»។

ការផ្លាស់ប្តូរដែលបានបញ្ជាក់របស់ប្រទេសនេះ ទៅជាការគ្រប់គ្រងបែបប្រជាធិបតេយ្យ ដែលបានចាប់   ផ្តើមបន្ទាប់ពីរដ្ឋប្រហារលើកដំបូង ក្នុងខែមករា ឆ្នាំ ២០២២ ត្រូវបានគ្រោងនឹងបញ្ចប់ នៅខែកក្កដា ឆ្នាំ២០២៤។ 

ប៉ុន្តែរបបយោធានៅឆ្នាំនោះ បានសម្រេចចិត្តពន្យាររយៈពេលអន្តរកាល ៥ឆ្នាំ ដោយអនុញ្ញាតឲ្យលោក Traore បន្តគ្រប់គ្រងប្រទេសនេះ ដែលកំពុងរងការញាំញីដោយអំពើហិង្សារបស់ក្រុមជីហាដ ដែលបានឆក់យកជីវិតមនុស្សរាប់ពាន់នាក់ ក្នុងរយៈពេលជិត ១០ឆ្នាំ៕