ការបិទដ្ឋាភិបាលដោយផ្នែកនៅសហរដ្ឋអាមេរិកនឹងបន្តទៅទៀត ទោះបីជាព្រឹទ្ធសភាអនុម័តសេចក្តីស្នើច្បាប់ដើម្បីផ្តល់មូលនិធិដល់ក្រសួងសន្តិសុខមាតុភូមិ (DHS) ក៏ដោយ។ កាលពីថ្ងៃព្រហស្បតិ៍ សភា មិនបានលើកឡើងពីសេចក្តីស្នើច្បាប់ផ្តល់មូលនិធិដែលព្រឹទ្ធសភាបានអនុម័តនោះទេ មានន័យថាការបិទរដ្ឋាភិបាលដោយផ្នែកដែលបានចាប់ផ្តើមនៅថ្ងៃទី ១៤ ខែកុម្ភៈ នឹងបន្តរហូតដល់យ៉ាងហោចណាស់ថ្ងៃចន្ទ នៅពេលដែលសភាជាន់ទាបបើកកិច្ចប្រជុំឡើងវិញ។ ភាពជាប់គាំងនេះ ផ្តោតលើថាតើក្រសួងសន្តិសុខមាតុភូមិ នឹងកែទម្រង់នីតិវិធីអន្តោប្រវេសន៍របស់ខ្លួនដែរឬយ៉ាងណា បន្ទាប់ពីការរិះគន់ចំពោះការជំរុញការនិរទេសទ្រង់ទ្រាយធំរបស់ លោក ប្រធានាធិបតី ដូណាល់ ត្រាំ។

ក្រុមប្រជាធិបតេយ្យ បានបដិសេធមិនអនុម័តការផ្តល់មូលនិធិដល់អង្គភាពអនុវត្តច្បាប់អន្តោប្រវេសន៍ និងគយ(ICE) និងគយ ការពារព្រំដែន(CBP) ដោយគ្មានការកែទម្រង់ការអនុវត្តរបស់ពួកគេ។ ភាពជាប់គាំងនេះ បានបង្កផលប៉ះពាល់ជាច្រើន។ ឧទាហរណ៍ក្រសួងសន្តិសុខមាតុភូមិទទួលបន្ទុករដ្ឋបាលសន្តិសុខដឹកជញ្ជូន(TSA) ហើយភ្នាក់ងារសន្តិសុខអាកាសយានដ្ឋានរបស់ខ្លួនគ្មានប្រាក់ឈ្នួលរយៈពេល៦សប្តាហ៍ចុងក្រោយនេះ។ ដោយសារភ្នាក់ងារអវត្តមាន មានជំងឺឬចាកចេញពីការងាររបស់ពួកគេ អាកាសយានដ្ឋានសហរដ្ឋអាមេរិក បានរាយការណ៍ពីអ្នកដំណើរស្ថិតក្នុងជួរវែងៗជាច្រើនជួរ និងការពន្យារពេលធ្វើដំណើរយ៉ាងច្រើន។

សេចក្តីស្នើច្បាប់ ដែលត្រូវបានអនុម័តដោយព្រឹទ្ធសភាកាលពីថ្ងៃពុធសប្តាហ៍មុន នឹងផ្តល់ហិរញ្ញវត្ថុដល់ រដ្ឋបាលសន្តិសុខដឹកជញ្ជូន(TSA) និងសាខាផ្សេងទៀតរបស់ក្រសួងសន្តិសុខមាតុភូមិ (DHS) ប៉ុន្តែនឹងមិនផ្តល់មូលនិធិបន្ថែមដល់អង្គភាពអនុវត្តច្បាប់អន្តោប្រវេសន៍និងគយ(ICE) និងគយ ការពារព្រំដែន(CBP) នោះទេ។ ប៉ុន្តែខណៈសមាជិកព្រឹទ្ធសភាក្រុមសាធារណរដ្ឋ បានគាំទ្រវិធានការនេះកាលពីសប្តាហ៍មុន ថ្នាក់ដឹកនាំក្រុមសាធារណរដ្ឋនៅក្នុងសភាបានបដិសេធមិនព្រមបោះឆ្នោតអនុម័តសេចក្តីស្នើច្បាប់នេះទេ។