ក្រសួងសុខាភិបាលប្រទេសស៊ូដង់ បាននិយាយថា បុគ្គលិកពេទ្យ និងរដ្ឋបាលយ៉ាងហោចណាស់១០នាក់បានស្លាប់ និងជនស៊ីវិលចំនួន២២នាក់បានរងរបួស កាលពីថ្ងៃព្រហស្បតិ៍ ក្នុងការវាយប្រហារដោយយានដ្រូនដែលកំណត់គោលដៅលើមន្ទីរពេទ្យ Al-Jabalain ក្នុងរដ្ឋ White Nile ប្រទេសស៊ូដង់ភាគកណ្តាល។

ក្រសួងបាននិយាយនៅក្នុងសេចក្តីថ្លែងការណ៍ថា «យានដ្រូនមួយគ្រឿងជាកម្មសិទ្ធិរបស់កងកម្លាំងគាំទ្ររហ័សយោធាប៉ារ៉ា(RSF) បានវាយប្រហារលើមន្ទីរពេទ្យ Al-Jabalain ដោយបានសម្លាប់សមាជិកបុគ្គលិកពេទ្យ និងរដ្ឋបាលចំនួន១០នាក់ ខណៈពួកគេកំពុងបំពេញកាតព្វកិច្ចមនុស្សធម៌ និងបានបណ្តាលឱ្យជនស៊ីវិល២២នាក់រងរបួស»។

ក្នុងចំណោមជនរងគ្រោះ រួមមាននាយកមន្ទីរពេទ្យ លោកវេជ្ជបណ្ឌិត Hamid Suleiman ដែលត្រូវបានសម្លាប់ក្នុងពេលកំពុងបំពេញការងារវះកាត់។ ក្រសួងបានថ្កោលទោស អ្វីដែលខ្លួនពិពណ៌នាថា ជា «ការកំណត់គោលដៅជាបន្តបន្ទាប់លើជនស៊ីវិល» ដោយសង្កត់ធ្ងន់ថា ការវាយប្រហារបែបនេះជាការរំលោភយ៉ាងធ្ងន់ធ្ងរលើបទដ្ឋាន និងច្បាប់អន្តរជាតិ។

នៅក្នុងសេចក្តីថ្លែងការណ៍មួយ ក្រសួងការបរទេសស៊ូដង់បាននិយាយថា ការវាយប្រហារនេះបានកំណត់គោលដៅទៅលើមណ្ឌលសុខភាពតែមួយគត់ដែលបម្រើប្រជាជននៅក្នុងតំបន់ ជាការរំលោភយ៉ាងច្បាស់លាស់លើច្បាប់ បទដ្ឋានអន្តរជាតិ និងមនុស្សធម៌។