មេធាវីសិទ្ធិមនុស្សឈានមុខគេរបស់អ៊ីរ៉ង់ លោកស្រី Nasrin Sotoudeh ត្រូវបានឃាត់ខ្លួនដោយភ្នាក់ងារស៊ើបការណ៍សម្ងាត់អ៊ីរ៉ង់ នៅផ្ទះរបស់ខ្លួន នៅទីក្រុងតេអេរ៉ង់នៅពេលយប់ថ្ងៃពុធ។ នេះបើយោងតាមការអះអាងដោយកូនស្រីរបស់លោកស្រី កាលពីថ្ងៃព្រហស្បតិ៍។

លោកស្រី Nasrin Sotoudeh អាយុ ៦៤ឆ្នាំ ដែលឈ្នះពានរង្វាន់ ត្រូវបានគេស្គាល់ថា ជាមេធាវីការពារក្តីដល់សកម្មជន អ្នកនយោបាយប្រឆាំង និងស្ត្រីជាច្រើនដែលត្រូវបានចោទប្រកាន់ពីបទដោះក្រមាជួតក្បាលរបស់ពួក។ លោកស្រី ត្រូវបានជាប់ពន្ធនាគារច្រើនដងហើយ និងបច្ចុប្បន្ន កំពុងនៅក្រៅឃុំដោយសារបញ្ហាសុខភាព។

ស្វាមីរបស់លោកស្រី គឺលោក Reza Khandan ដែលជាសកម្មជនល្បីឈ្មោះម្នាក់ផងដែរ បច្ចុប្បន្នកំពុងជាប់ពន្ធនាគារ Evinនៅក្នុងទីក្រុងតេអេរ៉ង់។

អ្នកស្រី Mehraveh Khandan បាននិយាយទៅកាន់សារព័ត៌មាន APពីទីក្រុង Amsterdam ប្រទេសហូឡង់ថា ខ្លួនបានទទួលសារពីក្រុមគ្រួសារនៅក្នុងប្រទេសអ៊ីរ៉ង់ តាមរយៈអ្នកសម្របសម្រួលម្នាក់ ដោយបញ្ជាក់ពីការចាប់ខ្លួនម្តាយរបស់អ្នកស្រី។ ការរឹតបន្តឹងលើការទំនាក់ទំនង និងអ៊ីនធឺណិតដែលដាក់ចេញ ចាប់តាំងពីខែមករាមក ធ្វើឲ្យការទាក់ទងជាមួយពិភពខាងក្រៅ ស្ទើរតែមិនអាចទៅរួចទេ៕