ប្រទេសអ៊ីរ៉ង់ និងសម្ព័ន្ធមិត្តរបស់ខ្លួន បានបាញ់ប្រហារតបត ជាមួយអ៊ីស្រាអែល និងសហរដ្ឋអាមេរិក ខណៈដែលធនធានមានទំនាក់ទំនងជាមួយទីក្រុងវ៉ាស៊ីនតោន នៅទូទាំងតំបន់មជ្ឈិមបូព៌ា ត្រូវបានកំណត់គោលដៅរួមជាមួយហេដ្ឋារចនាសម្ព័ន្ធថាមពល និងស៊ីវិល ដោយសង្គ្រាមរយៈពេល ១ខែនេះ គិតត្រឹមថ្ងៃសុក្រ (ទី៣ ខែមេសា ឆ្នាំ២០២៦) បានបង្ហាញសញ្ញាតិចតួចណាស់ថា នឹងធូរស្រាល។

ការវាយប្រហារបានកំណត់គោលដៅលើទីតាំងសេដ្ឋកិច្ច និងឧស្សាហកម្មកើនឡើងខ្លាំងទៅៗ ដែលបង្កើនការភ័យខ្លាចពីការមានការរំខានកាន់តែទូលំទូលាយ ចំពោះការផ្គត់ផ្គង់ថាមពលសកល និងផលប៉ះពាល់ដោយសារជម្លោះកាន់តែធ្ងន់ធ្ងរទៅៗ ហួសពីសមរភូមិ។

អ៊ីរ៉ង់បានបាញ់មីស៊ីលទៅកាន់ទីក្រុង Tel Aviv ពេញមួយយប់ ដោយបានធ្វើឲ្យប្រព័ន្ធការពារដែនអាកាសរបស់អ៊ីស្រាអែលប្រឹងស្ទាក់ចាប់យ៉ាងសកម្ម និងបណ្តាលឲ្យមនុស្ស ៤នាក់រងរបួសស្រាល ខណៈពេលដែលការផ្ទុះថ្មីៗត្រូវបានគេឮនៅក្នុងទីក្រុង Jerusalem បន្ទាប់ពីយោធាបានព្រមានអំពីការបាញ់ប្រហារ។

ក្នុងពេលជាមួយគ្នានេះ អ៊ីរ៉ង់បានបញ្ជាក់ថា ការវាយប្រហារជាបន្តបន្ទាប់ចុងក្រោយរបស់ខ្លួន បានវាយប្រហារគោលដៅនៅក្នុងប្រទេសអារ៉ាប់រួម បារ៉ែន និងអ៊ីស្រាអែល ដើម្បីសងសឹកចំពោះការវាយប្រហារពីមុនរបស់សហរដ្ឋអាមេរិក-អ៊ីស្រាអែល លើកន្លែងឧស្សាហកម្មរបស់ខ្លួន។ អ៊ីរ៉ង់បានឲ្យដឹងថា គោលដៅទាំងនោះ រួមមាន «ឧស្សាហកម្មដែកថែបអាមេរិក នៅទីក្រុង Abu Dhabi ឧស្សាហកម្មអាលុយមីញ៉ូមអាមេរិក នៅបារ៉ែន និងរោងចក្រអាវុធ Rafael របស់អ៊ីស្រាអែល»។ ទាំងអស់នេះជាសញ្ញាដែលបង្ហាញថា សាធារណរដ្ឋឥស្លាមនឹងប្រយុទ្ធមិនរាថយ ខណៈដែលលើកឡើងម្ដងហើយម្ដងទៀតថា នឹងធ្វើឲ្យសត្រូវរបស់ខ្លួនជួបនឹងលទ្ធផលធ្ងន់ធ្ងរ។

ប្រធានាធិបតីអាមេរិក លោក Donald Trump ដែលកាលពីថ្ងៃពុធបានគំរាមទម្លាក់គ្រាប់បែករហូតដល់សាធារណរដ្ឋឥស្លាម «វិលត្រលប់ទៅយុគសម័យថ្មរំលីងវិញ» បានបន្តវោហាសាស្ត្រឥតប្រណីរបស់លោក។ លោក Trump បានព្រមានថា ការវាយប្រហារបន្ថែមទៀត អាចកំណត់គោលដៅលើហេដ្ឋារចនាសម្ព័ន្ធថាមពលរបស់អ៊ីរ៉ង់ ប្រសិនបើមិនមានកិច្ចព្រមព្រៀងណាមួយត្រូវសម្រេចបានទេនោះ៕