បន្ទាប់ពីជោគជាំដោយការមើលងាយ និងការចំអកជាបន្តបន្ទាប់ ពីសំណាក់ប្រធានាធិបតីអាមេរិក លោក Donald Trump ពាក់ព័ន្ធនឹងបញ្ហាអ៊ីរ៉ង់ មេដឹកនាំអឺរ៉ុប បានចាប់ផ្តើមតបតវិញ ហើយប្រធានាធិបតីបារាំង លោក Emmanuel Macron បានលេចមុខឡើង ក្នុងនាមជាអ្នកនិយាយខ្លាំងជាងគេបំផុត។

កាលពីថ្ងៃព្រហស្បតិ៍ (ទី២ ខែមេសា ឆ្នាំ២០២៦) លោក Macron បានរិះគន់លោក Trump ចំពោះអ្វីដែលលោកនិយាយថា ជាវិធីសាស្រ្តមិនប្រាកដប្រជា ចំពោះសង្គ្រាម និងការវាយប្រហារ ដែលថា អង្គការណាតូ (NATO) មិនមានប្រយោជន៍អ្វីសោះ។ ក្នុងអំឡុងពេលធ្វើទស្សនកិច្ចនៅប្រទេសកូរ៉េខាងត្បូង លោក Macron បានលើកឡើងថា៖ «នៅពេលដែលយើងមានភាពប្រាកដប្រជា យើងមិននិយាយផ្ទុយពីអ្វីដែលយើងបាននិយាយកាលពីថ្ងៃមុនឡើយ»។

លោក Macron បានសង្កត់ធ្ងន់ថា៖ «យើងកំពុងនិយាយអំពីសង្គ្រាម យើងកំពុងនិយាយអំពីស្ត្រី និងបុរសដែលកំពុងប្រយុទ្ធ អំពីស្ត្រី បុរស និងជនស៊ីវិលដែលកំពុងត្រូវបានសម្លាប់។ យើងក៏កំពុងនិយាយអំពីផលប៉ះពាល់ដោយសារសង្គ្រាមនេះលើសេដ្ឋកិច្ចរបស់យើងផងដែរ»។

នេះគឺជាការបង្ហាញការខឹងសម្បាយ៉ាងច្បាស់ ចំពោះលោក Trump ខណៈមេដឹកនាំបារាំងមានមោទនភាពជាយូរមកហើយ ក្នុងនាមជាអ្នកដោះស្រាយដោយប៉ិនប្រសប់ជាមួយប្រធានាធិបតីអាមេរិក និងវិធីសាស្ត្រប្រែប្រួលម្ដងយ៉ាងនេះម្ដងយ៉ាងនោះរបស់លោក។ 

ប៉ុន្តែវាក៏បានឆ្លុះបញ្ចាំងផងដែរពីការប្រឆាំងកាន់តែខ្លាំងឡើងៗ ពីសំណាក់មេដឹកនាំអឺរ៉ុប ដែលពីមុនបានព្យាយាមធ្វើឲ្យមានតុល្យភាព រវាងការសង្ស័យយ៉ាងខ្លាំងរបស់ពួកគេ អំពីយុទ្ធនាការយោធា ជាមួយនឹងគោលបំណងមិនប្រឆាំងលោក Trump៕