ប្រទេសចិន នៅថ្ងៃសុក្រ (ទី៣ ខែមេសា ឆ្នាំ២០២៦) នេះ បានបញ្ជាក់ថា ការចរចា រវាងអាហ្វហ្គានីស្ថាន និងប៉ាគីស្ថាន កំពុងរីកចម្រើនជាលំដាប់ បន្ទាប់ពីមានរបាយការណ៍ ដែលថា ប្រទេសជិតខាងអាស៊ីខាងត្បូងទាំង២ កំពុងជួបប្រជុំគ្នា ដើម្បីព្យាយាមបញ្ចប់ជម្លោះដ៏អាក្រក់បំផុតរបស់ភាគីទាំង២ ចាប់តាំងពីក្រុមតាលីបង់បានវិលត្រឡប់ទៅកាន់អំណាចវិញនៅឆ្នាំ២០២១។

ចិនដែលមានព្រំដែនខាងលិចជាប់ប្រទេសទាំង២ បានព្យាយាមសម្របសម្រួល រវាងសម្ព័ន្ធមិត្តដែលបានក្លាយជាសត្រូវ ដោយការជជែកតាមទូរស័ព្ទជាមួយរដ្ឋមន្ត្រីការបរទេសរបស់ពួកគេ និងបញ្ជូនបេសកជនពិសេសម្នាក់ទៅទស្សនកិច្ចកាលពីខែមីនា។

អ្នកនាំពាក្យក្រសួងការបរទេស លោកស្រី Mao Ning បានប្រាប់សន្និសីទសារព័ត៌មានប្រចាំថ្ងៃថា៖ «ទាំងប៉ាគីស្ថាន និងអាហ្វហ្គានីស្ថាន ផ្ដល់សារៈសំខាន់ និងស្វាគមន៍ ចំពោះការសម្របសម្រួលរបស់ប្រទេសចិន ហើយមានឆន្ទៈក្នុងការអង្គុយចរចា ដែលជាការវិវត្តដ៏វិជ្ជមានមួយ»។

យ៉ាងណាក្ដី លោកស្រី Mao មិនបានបញ្ជាក់នោះឡើយថា តើកិច្ចចរចានេះ កំពុងត្រូវបានធ្វើឡើងនៅទីណា តែប្រទេសជិតខាងទាំង២ នៅមុននេះបានឲ្យដឹងថា ពួកគេកំពុងស្ថិតនៅក្នុងទីក្រុង Urumqi ភាគពាយ។

លោកស្រី Mao បានសង្កត់ធ្ងន់ថា ប្រទេសចិនបានសម្របសម្រួល និងលើកកម្ពស់កិច្ចចរចា នៅក្នុងទំនាក់ទំនងដ៏ជិតស្និទ្ធជាមួយភាគីទាំង២ ដើម្បីបង្កើតលក្ខខណ្ឌសមស្រប និងផ្តល់នូវវេទិកាមួយ ដោយបន្ថែមថា ប្រទេសទាំង៣ នឹងចេញព័ត៌មានបន្ថែមនៅក្នុងពេលវេលាសមស្រប។

ការប្រយុទ្ធគ្នា រវាងប៉ាគីស្ថាន និងអាហ្វហ្គានីស្ថាន ដែលបានចាប់ផ្តើមនៅក្នុងខែតុលាឆ្នាំមុន បានសម្លាប់មនុស្សជាច្រើននាក់នៃភាគីទាំង២ ដោយប្រជាជនអាហ្វហ្គានីស្ថានជាជនរងគ្រោះច្រើនបំផុត៕