អ្នកស្រី Jihane Salameh គឺពលរដ្ឋជម្លៀសខ្លួនលីបង់មួយរូប បានពិនិត្យមើលផ្ទះសម្បែងរងការខូចខាតរបស់គាត់នៅទីក្រុងភាគខាងត្បូង Tyre ។

ជាការប្រតិកម្មចំពោះសេចក្តីអត្ថាធិប្បាយរបស់រដ្ឋមន្រ្តីការពារជាតិអ៊ីស្រាអែលលោក Israel Katz ថា អ៊ីស្រាអែលនឹងរារាំងពលរដ្ឋលីបង់ពីការវិលត្រឡប់មកកាន់ផ្ទះសម្បែងរបស់ពួកគេវិញនៅតំបន់ភាគខាងត្បូងប្រទេសនោះ អ្នកស្រី Salameh និយាយថា ការសម្រេចចិត្តគឺជារបស់ពួកយើង ។

លោក Katz បាននិយាយកាលពីថ្ងៃអង្គារថា អ៊ីស្រាអែលនឹងកម្ទេចចោលឲ្យអស់ផ្ទះសម្បែងនៅតាមភូមិតំបន់ភាគខាងត្បូងលីបង់ ជិតព្រំដែនអ៊ីស្រាអែល ហើយមនុស្ស ៦០ម៉ឺននាក់ ដែលត្រូវបានជម្លៀសខ្លួនចេញពីតំបន់ភាគខាងត្បូង នឹងមិនអនុញ្ញាតឲ្យវិលត្រឡប់មកកាន់ផ្ទះសម្បែងរបស់ពួកគេនោះឡើយ រហូតដល់តំបន់ភាគខាងជើងអ៊ីស្រាអែលមានសុវត្ថិភាព ដោយរូបលោកសន្យាកម្ទេចតំបន់នោះឲ្យដូចជានៅតំបន់ហ្កាហ្សា ។

លោកថា អ៊ីស្រាអែល នឹងបង្កើតតំបន់ទ្រនាប់នៅក្នុងតំបន់ភាគខាងត្បូងប្រទេសលីបង់ ហើយនិងរក្សាការគ្រប់គ្រងតំបន់នោះទាំងស្រុងរហូតដល់ទន្លេ Litani នៅពេលដែលជម្លោះជាមួយក្រុមជីវពលហេសបូឡាបញ្ចប់ ។ កងកម្លាំងការពារជាតិអ៊ីស្រាអែល នឹងគ្រប់គ្រងតំបន់នេះរហូតដល់ទន្លេ Litani រួមទាំងស្ពានឆ្លងកាត់ទន្លេ Litani ខណៈកម្ចាត់ឲ្យអស់កងកម្លាំង Radwan ដែលបានជ្រៀតចូលតំបន់នោះ និងបំផ្លាញអាវុធទាំងអស់ដែលរកឃើញនៅទីនោះ ។ កងកម្លាំង Radwan គឺជាអង្គភាពយោធារណបក្រុមហេសបូឡា ។

សូមបញ្ជាក់ថា អ៊ីស្រាអែល បានបើកយុទ្ធនាការតាមច្រកអាកាស និងជើងគោកពេញបន្ទុករបស់ខ្លួន ក្រោយក្រុមហេសបូឡា វាយប្រហារអ៊ីស្រាអែលកាលពីថ្ងៃទី ២ ខែមីនា ជាការបង្ហាញសាមគ្គីភាពជាមួយអ៊ីរ៉ង់ បន្ទាប់ពីសហរដ្ឋអាមេរិក និងអ៊ីស្រាអែល ចាប់ផ្តើមសង្រ្គាមរបស់ពួកគេលើទីក្រុងតេអេរ៉ង់ ។ 

មនុស្សជាង ១.៣០០នាក់ ត្រូវបានសម្លាប់ នៅក្នុងការវាយប្រហាររបស់អ៊ីស្រាអែល និងប្រហែលជា ១ភាគ ៥នៃពលរដ្ឋលីបង់ បានជម្លៀសខ្លួន ។ អ៊ីស្រាអែលបានចេញបញ្ជាឲ្យជម្លៀសខ្លួននៅតំបន់ប្រហែល ១៥ភាគរយនៃទឹកដីលីបង់ ៕