នៅថ្ងៃសុក្រ (ទី៣ ខែមេសា ឆ្នាំ២០២៦) នេះ យន្តហោះចម្បាំង Su-30 របស់រុស្ស៊ី ១គ្រឿង បានធ្លាក់នៅឧបទ្វីបគ្រីម៉ា (Crimea) ដែលទីក្រុងមូស្គូបានបញ្ចូលជាដែនដីឧបសម្ព័ន្ធក្នុងឆ្នាំ២០១៤។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានរដ្ឋ TASS ដោយដកស្រង់ប្រភពពីក្រសួងការពារជាតិរុស្ស៊ី។

ក្រសួងបានឲ្យដឹងនៅក្នុងសេចក្តីថ្លែងការណ៍មួយថា៖ «អាកាសយានិក បានលោតចេញ ហើយត្រូវបានរកឃើញដោយក្រុមស្វែងរក និងជួយសង្គ្រោះនៅលើដី។ មិនមានការគំរាមកំហែងដល់អាយុជីវិតរបស់អ្នកបើកយន្តហោះឡើយ»។

សារព័ត៌មាននេះបានឲ្យដឹងទៀតថា យន្តហោះនេះបានធ្លាក់នៅម៉ោងប្រហែល ១១:០០ ម៉ោងនៅទីក្រុងមូស្គូ (ត្រូវនឹងម៉ោង ៩:០០ ម៉ោងសកល) ក្នុងអំឡុងពេលហោះហើរហ្វឹកហាត់តាមកាលវិភាគ ដោយបន្ថែមថា យន្តហោះនេះមិនមានផ្ទុកគ្រាប់រំសេវនោះទេ។

កាលពីដើមសប្តាហ៍នេះ រុស្ស៊ីបានឲ្យដឹងថា យន្តហោះដឹកជញ្ជូនយោធា An-26 ១គ្រឿង បានធ្លាក់នៅឧបទ្វីបគ្រីម៉ា ក្នុងអំឡុងពេលហោះហើរតាមកាលវិភាគ ដោយបានសម្លាប់មនុស្ស ២៩នាក់។ ក្រសួងបានបញ្ជាក់ថា មានអ្នកដំណើរ ២៣នាក់ និងសមាជិកនាវិក ៦នាក់ នៅលើយន្តហោះនោះ៕