ចិននិយាយនៅថ្ងៃសុក្រនេះថា កិច្ចចរចារវាងអាហ្វហ្គានីស្ថាន និងប៉ាគីស្ថាន បានដំណើរការប្រកបដោយវឌ្ឍនភាពបន្តិចម្តងៗ បន្ទាប់ពីសេចក្តីរាយការណ៍ថា ប្រទេសជិតខាងនៅអាស៊ីខាងត្បូងទាំង ២ មាននូវជំនួបនៅទីនោះ ដើម្បីព្យាយាមបញ្ចប់ជម្លោះដ៏អាក្រក់បំផុតរបស់ពួកគេ ចាប់តំាងពីក្រុមតាលីបង់វិលត្រឡប់មកកាន់អំណាចវិញកាលពីឆ្នាំ ២០២១ ។

ចិនដែលមានព្រំដែនភាគខាងលិចរួមគ្នាជាមួយប្រទេសទាំង ២ បានព្យាយាមសម្របសម្រួលរវាងប្រទេសមិត្តក្លាយជាសត្រូវទាំង ២ ដោយមានការជជែកគ្នាតាមទូរស័ព្ទជាមួយរដ្ឋមន្រ្តីការបរទេសរបស់ពួកគេ ហើយនិងបញ្ជូនប្រេសិតពិសេស សម្រាប់ដំណើរទស្សនកិច្ចកាលពីខែមីនា ។

អ្នកនាំពាក្យក្រសួងការបរទេសចិនអ្នកស្រី Mao Ning និយាយប្រាប់សន្និសីទសារព័ត៌មានថា ប៉ាគីស្ថាន និងអាហ្វហ្គានីស្ថាន បានឲ្យតម្លៃ និងស្វាគមន៍កិច្ចខិតខំសម្របសម្រួលរបស់ចិន ហើយនិងចង់ចាប់ផ្តើមកិច្ចប្រជុំឡើងវិញ ។ 

អ្នកស្រី Mao ពុំបាននិយាយថាតើ ទីណាដែលជំនួបត្រូវបានធ្វើឡើងនោះទេ បើទោះបីជាប្រទេសជិតខាងទាំង ២ធ្លាប់បាននិយាយកាលពីមុនថា ពួកគេជួបពិភាក្សាគ្នានៅទីក្រុងភាគពាយព្យ Urumqi របស់ចិនក៏ដោយ ។

អ្នកស្រីនិយាយថា ចិនបានសម្របសម្រួល និងលើកកម្ពស់កិច្ចប្រជុំ ដោយមានទំនាក់ទំនងជិតស្និតជាមួយភាគីទាំង ២ ដើម្បីបង្កើតលក្ខខណ្ឌដ៏ស័ក្តិសម និងផ្តល់ជាវេទិកា សម្រាប់ពួកគេ ។

ការប្រយុទ្ធគ្នារវាងប៉ាគីស្ថាន និងអាហ្វហ្គានីស្ថាន ដែលបានចាប់ផ្តើមកាលពីខែតុលា ឆ្នាំកន្លងទៅ បានសម្លាប់មនុស្សរាប់សិបនាក់ នៅភាគីប្រទេសទំាង ២ ក្នុងនោះអាហ្វហ្គានីស្ថាន រងគ្រោះខ្លាំងជាងគេ ។

ទីក្រុងអ៊ីស្លាម៉ាបាដ បានចោទប្រកាន់ក្រុមតាលីបង់អាហ្វហ្គានីស្ថានថា ផ្តល់ជម្រកជ្រកកោនដល់ក្រុមជីវពលអ៊ិស្លាមដែលបានបើកការវាយប្រហារនៅប្រទេសប៉ាគីស្ថាន បើទោះបីជាទីក្រុងកាប៊ុល ធ្វើការច្រានចោលយ៉ាងណាក្តី ៕