គូវ៉ែតនិយាយថា រោងចក្រថាមពល និងរោងចក្របន្សុតទឹក រងការវាយប្រហាររបស់អ៊ីរ៉ង់ ស្របពេលដែលបណ្តាប្រទេសក្នុងតំបន់ឈូងសមុទ្រ បន្តប្រឈមនឹងការវាយប្រហារសងសឹកធ្ងន់ធ្ងរនៅថ្ងៃទី ៣៥ នៃសង្រ្គាមរបស់សហរដ្ឋអាមេរិក និងអ៊ីស្រាអែលលើអ៊ីរ៉ង់ ។

ក្រុមអាជ្ញាធរនៅគូវ៉ែត និយាយថា រោងចក្ររបស់ពួកគេ រងការវាយប្រហារនៅមុនថ្ងៃត្រង់ម៉ោងក្នុងស្រុក ថ្ងៃសុក្រ ។ ទំហំនៃការខូចខាត ពុំត្រូវបានដឹងច្បាស់នោះទេ ។

ទីភ្នាក់ងារព័ត៌មានរដ្ឋ KUNA រាយការណ៍ថា ការវាយប្រហារនេះ បានកើតមានឡើងរយៈពេលប៉ុន្មានម៉ោងប៉ុណ្ណោះ ក្រោយរោងចក្រចម្រាញ់ប្រេង Mina al-Ahmadi បានក្លាយជាគោលដៅវាយប្រហារយានដ្រូននៅពេលព្រឹកថ្ងៃសុក្រនេះ ហើយការវាយប្រហារនេះដែរ បណ្តាលឲ្យមានការឆាបឆេះជាអគ្គិភ័យនៅតាមអង្គភាពប្រតិបត្តិការជាច្រើន ប៉ុន្តែពុំមាននិយោជិកណាម្នាក់ រងរបួសនោះឡើយ ។

ទីភ្នាក់ងារ KUNA រាយការណ៍ថា ក្រុមជួយសង្រ្គោះបន្ទាន់ និងក្រុមភ្នាក់ងារពន្លត់អគ្គិភ័យ ត្រូវបានបញ្ជូនទៅកាន់កន្លែងកើតហេតុ ហើយក្រុមអាជ្ញាធរបរិស្ថាន បន្តតាមដានតំបន់ជុំវិញរោងចក្រចម្រាញ់ប្រេង ដើម្បីពិនិត្យគុណភាពខ្យល់ ក្នុងនោះក្រុមអាជ្ញាធរ បានច្រានចោលពាក្យចចាមអារ៉ាមពីលទ្ធភាពនៃការលេចធ្លាយសារធាតុវិទ្យុសកម្ម ។

លោក Malik Traina គឺជាអ្នកធ្វើសេចក្តីរាយការណ៍របស់កាសែត Al Jazeera រាយការណ៍ថា នេះគឺជារោងចក្រចម្រាញ់ប្រេងលើកទី ៣ រងការវាយប្រហារ ហើយមនុស្សនៅទូទាំងប្រទេស កំពុងស្ថិតក្នុងការប្រុងជើងការខ្ពស់ ។

លោកបន្តថា វាស្ថិតនៅក្នុងចំណោមរោងចក្រចម្រាញ់ប្រេងធំជាងគេបំផុតនៅតំបន់មជ្ឈិមបូព៌ា ហើយវាក៏ជារោងចក្រចម្រាញ់ប្រេងដ៏សំខាន់មួយសម្រាប់ការប្រើប្រាស់ក្នុងស្រុក ៕