ការបញ្ជាទិញមីស៊ីល Tomahawk រាប់រយគ្រាប់របស់ប្រទេសជប៉ុន ពីសហរដ្ឋអាមេរិក កំពុងស្ថិតក្នុងហានិភ័យ ខណៈដែលសង្គ្រាមអាមេរិក-អ៊ីស្រាអែល ជាមួយអ៊ីរ៉ង់ កំពុងធ្វើឲ្យឃ្លាំងអាវុធកាន់តែអស់ទៅៗ ជាឧទាហរណ៍ចុងក្រោយបំផុតនៃរបៀបដែលជម្លោះកំពុងបឺតយកការផ្គត់ផ្គង់ និងកងទ័ព ខណៈកាត់បន្ថយសមត្ថភាពតទល់នឹងគូប្រជែងយុទ្ធសាស្ត្រដ៏ធំជាងគេរបស់ទីក្រុងវ៉ាស៊ីនតោន គឺចិន។

មីស៊ីល Tomahawk គឺជាចំណុចផ្ដោតជាចម្បងនៃយុទ្ធសាស្ត្រថ្មីរបស់ទីក្រុងតូក្យូ ក្នុងការបំពាក់អាវុធ ជាមួយនឹងសមត្ថភាពវាយប្រហាររយៈចម្ងាយឆ្ងាយ ដើម្បីដោះស្រាយបញ្ហាប្រឈមពីចិន និងកូរ៉េខាងជើង។ ប៉ុន្តែបើយោងតាមបុគ្គលដែលដឹងស្ថានភាពនេះ បានឲ្យដឹងថា ទីក្រុងវ៉ាស៊ីនតោនបានជូនដំណឹងដល់ទីក្រុងតូក្យូថា ការដឹកជញ្ជូនសម្រាប់ការបញ្ជាទិញមីស៊ីលប្រហែល ៤០០គ្រាប់ នៅខែមីនា ឆ្នាំ២០២៨ នឹងត្រូវបានរំខាន។

ដោយបាននិយាយក្នុងលក្ខខណ្ឌមិនបញ្ចេញឈ្មោះ បុគ្គលម្នាក់ដែលដឹងពីបញ្ហានេះ បានឲ្យដឹងថា សហរដ្ឋអាមេរិកបានប្រើប្រាស់មីស៊ីល Tomahawk រាប់រយគ្រាប់ ក្នុងអំឡុងពេលវាយប្រហារ លើអ៊ីរ៉ង់។ អាមេរិកមានមីស៊ីល Tomahawk ប្រហែល ៤.០០០គ្រាប់ នៅក្នុងស្តុក មុនមានសង្គ្រាម ក្នុងនោះរួមមានទាំងម៉ូដែលចាស់ៗ និងប្រភេទប្រឆាំងនាវា។ ក្រុមហ៊ុន RTX Corp. បានផលិតមីស៊ីលថ្មីប្រហែល ១០០គ្រាប់ នៅឆ្នាំ២០២៥ ខណៈដែលម៉ូដែលចាស់ៗប្រហែល ២៤ ត្រូវបានអភិវឌ្ឍឲ្យទៅជាស្តង់ដារ Block V ចុងក្រោយបំផុត។

ការបញ្ជាទិញតម្លៃ ២,៣៥ពាន់លានដុល្លាររបស់ជប៉ុន ដែលត្រូវបានចុះហត្ថលេខានៅឆ្នាំ២០២៤ គឺជាការបញ្ជាទិញដ៏ធំបំផុតមួយពីក្រៅប្រទេស។ រដ្ឋមន្ត្រីក្រសួងការពារជាតិជប៉ុន លោក Shinjiro Koizumi បាននិយាយកាលពីខែមីនាថា ការដឹកជញ្ជូនមីស៊ីល Tomahawk ដំបូង ត្រូវបានទទួល។ តែយ៉ាងណាក្ដី តាមមនុស្ស ២នាក់ ដែលដឹងពីកិច្ចការនេះ បានឲ្យដឹងថា សហរដ្ឋអាមេរិកបានបញ្ជាក់ថា អាទិភាពរបស់ខ្លួន ឥឡូវនេះគឺធានាការផ្គត់ផ្គង់ សម្រាប់សង្គ្រាមនៅអ៊ីរ៉ង់។

គេនៅមិនច្បាស់ទេថា តើមានហានិភ័យ ដែលសហរដ្ឋអាមេរិកនឹងខកខានមិនអាចបំពេញតាមថ្ងៃកំណត់ខែមីនា ឆ្នាំ២០២៨ ដើម្បីបញ្ចប់ការដឹកជញ្ជូនដែរ ឬយ៉ាងណា ដោយសារមានការរំពឹងទុកពីការរំខាន ចំពោះលំហូរនៃការផ្គត់ផ្គង់៕